3-j
Bienveníes:
Lo que buscamos ye simple y radical: parar esti xenocidiu.
Queremos dexar de ver cómo les bombes asesinen a neñes y neños inocentes y necesitamos terminar con esta indiferencia fría y adversa delantre’l sufrimientu de los seres del planeta.
Nun se trata de tomar partíu por bandu dalu nin de defender una posición xeopolítica. Lo que ta pasando va más allá de la defensa d’intereses comerciales o de seguridá de los Estaos occidentales y ricos. Esta situación tresciende los estrenchos intereses partidistes que s’anteponen a la vida de millones de persones palestines.
L’enguedeyu intencionáu ente intereses y política tien como oxetivu desorientar les mentes y los corazones de quien conformamos esta sociedá.
Detener la violencia y la crueldá indiscriminada, y poner fin a un xenocidiu, ye lo que reclamamos nesta y en cada movilización.
El númberu de persones palestines asesinaes pola mortal agresión d’Israel escontra la Franxa de Gaza aumentó a 36.439, confirmaben fontes médiques.
Añadíen que polo menos otres 82.627 persones tamién resultaron firíes na más reciente escalada del xenocidiu sionista. Acordies col Ministeriu de Salú palestín, munches víctimes, más de 10.000, tovía tán atrapaes baxo l’escombriu y nes carreteres, yá que les persones rescatistes entá nun puen llegar a elles.
Les cifres de l’atrocidá que da l’observatoriu Euro-Mediterraneu, con sede en Xinebra: son más de 42.000 les persones asesinaes.
Esti observatoriu documenta cómo dempués de que’l TPI (Tribunal Penal Internacional) ordenara a Israel que cesara toles operaciones na provincia de Rafah, Israel ta intensificando, acelerando’l ritmu de los bombardeos aéreos y d’artillería y ampliando’l círculu d’asesinatos y atacando directamente a civiles.
Esto ye: otra vez el gobiernu israelín mexa nel drechu internacional, y en toos y caún de los sos encamientos.
Israel bombardió tiendes de campaña pa xente esllarigao nes proximidaes de les instalaciones de la UNRWA.
Israel sigue cometiendo los crímenes más sangrinos escontra civiles palestinos na Franxa de Gaza cola intención de desanicialos, n’incumplimientu evidente y cruel del drechu internacional y de les sentencies del Tribunal Penal Internacional (TPI).
Euro-Med Human Rights Monitor reitera’l so llamáu a toles naciones pa que cumplan coles obligaciones internacionales y pongan fin a tou apoyu militar, políticu y financieru al ataque militar d’Israel escontra la Franxa de Gaza. En particular, toles tresferencies d’armes a Israel, incluyíos los permisos d’esportación y l’asistencia militar, hai que los suspender d’inmediato; de lo contrario, estes naciones van ser consideraes cómplices de los crímenes israelinos cometíos na Franxa, incluyíu’l xenocidiu.
Euro-Med Monitor pide al Tribunal qu’amplíe les llistes d’órdenes d’arrestu pa incluyir a más funcionarios israelinos. Israel ta cometiendo xenocidiu ensin ambigüedaes, un crime internacional que cai dientro de la xurisdicción del TPI.
Va tiempu qu’un activista de la causa histórica de Palestina (que tuvo equí nesti parque y delantre esa placa que recuerda a Vicente García Riestra, sobreviviente del nazismu) reclamara un nuevu Nuremberg, pa enxuiciar los crímenes sionistes.
Nazis y sionistes agora apaecen aliaos y abrazaos na mesma causa de l’aniquilación palestina.
Dicen, quien apellen a la memoria pa que nun se repitan atrocidaes, que cada día hai un nuevu Gernika en Palestina, y cada día hai una repetida aviación Cóndor, pero esta vez con armes d’Estaos Xuníos.
Un neñu, una neña aniquilada cada 15 minutos. Y hasta sobrevivientes del xenocidiu en Ruanda tán pronunciándose escontra’l xenocidiu israelín en Palestina.
Lo mesmo que les estraordinaries acampaes nes universidaes, incluyida l’asturiana. O’l ñetu de Mandela, o la cantidá de persones xudíes antisionistes que tán glayando: Non nel nuestru nome.
146 son agora los países que reconocieron formalmente Palestina. L’anomalía perversa ta en quien nun la “reconocen” porque siguen a pies xuntos el mandatu y la orde sionista.
Valoramos que’l gobiernu español cumpla cola so obligación d’apoyar a la UNRWA, sometida al xantaxe y la provocación sionista pa que nun cumpla la so función humanitaria. La UNRWA dexará de ser necesaria cuando regresen los 6 millones de persones refuxaes, como ye drechu de so y como estipulen les resoluciones de la Organización de Naciones Xuníes.
Aisllar internacionalmente a Israel va contribuyir a parar l’esterminiu. Como sía. Por eso, el reconocimientu del Estáu palestín, que paez insuficiente, que llega tarde y que se llevó a efectu en metá d’una campaña electoral, ye una bona noticia. Porque la sociedá palestina tienlo declarao asina.
Sigue siendo imposible alcontrar calificativos al horror sionista, qu’ayeri, de nuevo bombardiaba, destruyía, asesinaba, mientres que se producíen nueves manifestaciones grandes, en París y Rennes / Roazhon, en Copenhague, en Tokio, n’Estrasburgu, en Bruxeles, en varies xeografíes del mundiu esixendo parar el xenocidiu.
Mentanto recordemos la ferramienta del BDS, boicó-desinversiones-y-sanciones hasta que se detenga la llimpieza étnica, y que siguimos esixendo la fin de la compra y venta d’armes y de les rellaciones diplomátiques d’España con Israel, aplicándose la orde de detención escontra Netanyahu.
Más de 250 xuristes, caderalgues, abogaos, xueces, pidieron al nuestru gobiernu que se sume a la demanda sudafricana en La Haya, pol xenocidiu israelín.
Dende Siero reiteramos la nuestra fraternidá col pueblu de Palestina.
Deja una respuesta