La XIXª Delegación Asturiana de Drechos Humanos y Paz
XIX Visita Asturiana pa Pescudar l’Estáu de los Drechos Humanos y la Paz en Colombia
Visita realizada ente’l 13 y el 24 de febreru del 2023
Semeyes: XIX Delegación Asturiana pa Pescudar l’Estáu de los Drechos Humanos y la Paz en Colombia
Edita: XIX Delegación Asturiana
Traducción: Xosé Firmu García Cosío
La XIXª delegación asturiana AGRADEZ l’acoyida por parte d’organizaciones ya instituciones colombianes, y de manera especial al Comité de Selección del Programa Asturianu d’Atención a Víctimes de la Violencia en Colombia, PAV-DDHH, integráu por CPDH, CSPP, ONIC, ANDAS, CUT, CAJAR, MOVICE, CNA y Fensuagro, pol acompañamientu nel desarrollu de la nuesa visita.
ÍNDIZ
Presentación
Estáu de los Alcuerdos de L’Habana y del procesu de Paz coles FARC
La Xusticia Especial pa la Paz, XEP
Unidá de Busca de Persones daes por Desapaecíes
Comisión de la Verdá
Reforma Rural Integral. Restitución de tierres
Capítulu étnicu y de xéneru
Situación col ELN
Los Drechos Humanos nel 2022
Rexones visitaes:
Nariño
Putumayo
Sur del Huila
Casanare
Arauca
1-. Ataques a la dirixencia social, persistencia del paramilitarismu.
2-. Execuciones estraxudiciales y masacres.
3-. Población en situación d’esllarigamientu.
4-. Persones privaes de la llibertá. Tortura, tratu cruel, inhumanu o degradante
5-. Muyeres, infancia, mocedá, víctimes, población LGBTI.
6-. Impunidá.
7-. Puelos indíxenes.
Conclusiones y recomendaciones
Instituciones y organizaciones entrevistaes
La XIX Delegación Asturiana pa Pescudar l’Estáu de los Drechos Humanos en Colombia tevo integrada por:
RAFAEL PALACIOS GARCÍA. Diputáu y voceru del Grupu Políticu Podemos na Xunta Xeneral del Principáu d’Asturies.
JAVIER ARJONA MUÑOZ. Soldepaz Pachakuti.
MATEO GONZÁLEZ CID. Inxeniería Ensin Fronteres, ISFA.
HELENA PLAZA MARTÍN. Espaciu mozu de Comisiones Obreres d’Asturies, CC. OO.
RUBÉN FERNÁNDEZ GUTIÉRREZ. Movimientu Asturianu pola Paz, MASPAZ.
MANUEL ÁLVAREZ MARTÍNEZ. Movimientu Asturianu pola Paz, MASPAZ.
CRISTINA FERNÁNDEZ ALONSO. Asamblea Moza d´Asturies, AMA.
MINERVINO DE LA RASILLA SUÁREZ. Coordinadora Asturiana d’ONGDs.
LUIS ESCRIBANO, de l’asociación Burgos con Colombia.
JAVIER OROZCO PEÑARANDA. Director del Programa Asturianu d’Atención a Víctimes de la Violencia en Colombia. Técnicu de la XIX Delegación Asturiana.
Territorios percorríos:
Departamentu de Nariño: Tumaco, Pasto.
Departamentu del Putumayo: Puerto Guzmán y Villagarzón.
Departamentu del Huila: Pitalito.
Departamentu del Casanare: Yopal, Nunchía.
Departamentu d’Arauca: ciudaes d’Arauca y Saravena.
Bogotá D.C.
Presentación
LOS ATAQUES NUN DEBILITEN LA ESPERANZA DE PAZ
La XIXª Delegación Asturiana de Drechos Humanos y Paz percorrió en febreru rexones
de la Colombia somorguiada nel conflictu armáu, nes que siguen los ataques escontra la
población civil y escontra la dirixencia social, incluyida la indíxena, a pesar del
ofrecimientu del gobiernu de Gustavo Petro y Francia Márquez de dialogar, cesar el
fueu y alcordar los términos que lleven a la “Paz total”.
Aconceyemos con organizaciones sociales, víctimes, autoridaes civiles, policiales y
militares, amás de los alcuentros con funcionarios del Ministeriu del Interior, la Unidá
Nacional de Restitución de Tierres, la Cancillería Colombiana, la Oficina de la ONX pa
los Drechos Humanos y la Embaxada d’España.
La nuesa delegación alcontró na visita a Tumaco, Pasto, Puerto Guzmán, Villagarzón,
Pitalito, Yopal, Arauca y Saravena una población organizao, que llogró resistir
acusaciones, amenaces, prisión inxusta, confinamientu, esllarigamientos, ataques a los
centros, desapaiciones forciaes, campos minaos, masacres y asesinatos selectivos.
A pesar del axorizu desatáu nes últimes décades amplios sectores sociales dixeron de
manera masiva: ¡valió de guerra, valió de saquéu y valió de mieu al apa de la
democracia y del progresu!
Espresamos almiración pola so valerosa persistencia en defender el drechu a la vida, al
territoriu, a la paz y a les llibertaes fundamentales.
Sois un exemplu pal mundiu y una respuesta pa los qu’atesteronen en siguir
amontonando riqueces usando’l métodu del desaposiu, quemando con más violencies el
llar común que ye la Tierra, imponiendo guerres que paguen los puelos.
La nuesa delegación conoz la resistencia de los puelos de Nariño, Putumayo, Huila,
Casanare y Arauca, felicita al gobiernu, y de manera especial a los habitantes del
páramu del Sumapaz, pola creación reciente de la Zona de Reserva Llabriega tres mediu
sieglu de guerra y trenta años d’intentalo col propósitu de protexer la economía
llabradora, l’agua, la seguridá y la soberanía alimentaria pa los millones d’habitantes
d’una ciudá del tamañu de Bogotá.
La gravedá de los ataques escontra la dirixencia social xenera mieu y provoca’l nuesu
refugu, pero nun llogren debilitar les ansies de paz de les multitúes qu’emburrien la
tresformación democrática de la sociedá colombiana.
Rafael Palacios García
Diputáu y voceru del Grupu Parllamentariu Podemos na Xunta Xeneral del
Principáu d’Asturies
Estáu de los Alcuerdos de L’Habana y del procesu de Paz coles FARC
“Nun mundiu de divisiones xeopolítiques, guerres interminables y multiplicación de conflictos, Colombia manda güei un mensaxe claru: ye hora d’invertir na paz”.António Guterres, Secretariu Xeneral de la ONX.[1]
La sociedá colombiana pronuncióse masivamente pola paz. L’alcuerdu de paz soscritu pol Estáu coles FARC xeneró unes espectatives que defraudaron los gobiernos de Juan Manuel Santos y d’Iván Duque.
Dende agostu del 2022 el gobiernu de Gustavo Petro y Francia Márquez comprometióse a cumplir l’alcuerdu como puntu de partida pa la so política de Paz Total.
La violencia nel contestu del conflictu armáu internu recrudecióse nel gobiernu d’Iván Duque (2018-2022), periodu nel que se quixo estrizar los alcuerdos de paz simulando’l so cumplimientu.
Antes, el gobiernu de Juan Manuel Santos (2014-2018), que soscribió l’alcuerdu, en tando desarmaes les FARC abandonó la obligación de protexer la vida de les persones desmovilizaes, destinar inversión pública y otorga-yos garantíes polítiques.
Nengún de los últimos trés gobiernos colombianos (Santos, Duque, Petro) llogró garantizar la vida de los firmantes de la paz, que siguen siendo amenazaos, confinaos, persiguíos, esllarigaos y asesinaos nos espacios destinaos pa que se reintegren a la sociedá.
“La esperanza de paz de millones de persones foi burllada, ensangrentada pol bloque de poder dominante que demonizó l’alcuerdu de paz pa siguir cola rentable estratexa d’acumulación de tierres y de capital por desaposiu. Poro, el gobiernu de Duque nun adoptó’l plan d’aición pa combatir y esmantelar el paramilitarismu, pero intentó ‘entrampar’ a ex-dirixentes de les FARC con montaxes de la Fiscalía y de la DEA p’apresalos con fines d’estradición a los Estaos Xuníos. Polo mesmo nun quixo atender los mandatos de la Corte Constitucional que —en sentencia d’empiezos del 2022— señaló l’ausencia de voluntá política del gobiernu pa protexer la vida de quien firmaron l’alcuerdu, nin cumplió les órdenes que-y dio, col mesmu propósitu, la Xurisdicción Especial pa la Paz énte l’asesinatu de 355 firmantes del alcuerdu”.[2]
L’abandonu pol últimu gobiernu del alcuerdu de paz constátase al destinar el 0’8% del PIB pal so cumplimientu, cuando’l compromisu yera del orde del 10%, reduciendo la paz a la desmovilización guerrillera y a la entrega de les armes.
Con too y con eso, l’alcuerdu de paz sigue con prioridá na axenda del nuevu gobiernu y na esperanza de millones de persones que se manifiesten pol so cumplimientu y pola solución política y negociada del conflictu armáu internu.
El partíu políticu Comunes considera que col gobiernu de Petro rellanzóse l’alcuerdu de paz. “Nós cumplimos. El gobiernu de Duque dedicóse a asonsañar que cumplíen. Entrampiaron la paz. Hai tamién planes macabros escontra nós, los Comunes, que llevamos 357 asesinaos y SIMÓN TRINIDAD sigue presu nos Estaos Xuníos”.[3]
El partíu políticu Comunes, ñacíu tres la desmovilización de les FARC, denuncia qu’una suma superior a los 600.000.000.000 de pesos que debíen destinase pa proyectos de reinserción a la vida civil robólos o esviólos el gobiernu d’Iván Duque.
Denuncien que 187 presos políticos de les FARC y otros 200 en procesu de reconocimientu siguen nes prisiones, ensin que s’aplicaren les normes sobre amnistía ya indultu contemplaes nel alcuerdu de paz.
Reclamen la repatriación de JUVENAL PALMERA PINEDA o Simón Trinidad, presu fai cerca de venti años nos Estaos Xuníos por delitos políticos cometíos en Colombia nel marcu del conflictu armáu internu, polo que debiera xulgáselu en Colombia y aplicáse-y lo dispuesto nel alcuerdu de paz: «A la cesación de los enfrentamientos, les autoridaes nel poder procurarán conceder l’amnistía más amplia posible a les persones que tomaren parte nel conflictu armáu o que s’alcuentren privaes de llibertá, internaes o deteníes por motivos rellacionaos col conflictu armáu… Otramiente, l’artículu 7u de la Llei d’Amnistía ya Indultu diz: «sedrá un mecanismu d’estinción de l’aición penal, disciplinaria, alministrativa y fiscal, que tien como finalidá otorgar seguridá xurídica a los integrantes de les FARC-EP o a persones acusaes de selo, tres la firma del Alcuerdu Final de Paz col Gobiernu nacional y la finalización de los enfrentamientos».
La Xusticia Especial pa la Paz, XEP
La Xurisdicción Especial pa la Paz avanza nel conocimientu de la verdá nos casos de secuestros y d’execuciones estraxudiciales, y abrió otru macrocasu sobre violencia sexual nel contestu del conflictu armáu internu.
Constitúi un avance na llucha escontra la impunidá y una aportación al drechu de les víctimes el que militares y ex-combatientes de les FARC tean compareciendo delantre la XEP pa dar la so versión referente a casos de miles de secuestros y miles d’asesinatos y desapaiciones forciaes presentaes como “baxes en combate” por axentes del Estáu.
“Dempués de que 22 integrantes de la fuercia pública y un civil, en dos audiencies públiques, reconocieren delantre la XEP responsabilidá polos asesinatos y desapaiciones forciaes presentaes como baxes en combate por axentes del Estáu, la Sala de Reconocimientu de Verdá emitió les primeres resoluciones de conclusiones. Les decisiones xudiciales emitiéronse dientro de los subcasos Norte de Santander y Costa Caribe, nos que los imputaos por ‘falsos positivos’ fueron postulaos pa que’l Tribunal pa la Paz-yos imponga sanciones propies. La primer resolución de conclusiones qu’emitió la XEP enmárcase nel subcasu Norte de Santander, nel que la Sección de Primer Instancia pa Casos de Reconocimientu de Verdá yá anunció qu’asume la competencia. Con ello, confírmase que sedrá esta instancia la que decidirá sobre les sanciones que se-yos impondrán a los comparecientes que participaron na audiencia que se llevó a cabu n’Ocaña’l 21 y 22 d’abril de 2022. L’otru autu emitióse’l pasáu 9 d’avientu, y conocióse tres l’audiencia que se llevó a cabu en Valledupar el 18 y 19 de xunetu. N’entrambos casos, delantre la xusticia, les víctimes y el país, los comparecientes refiriéronse a los crímenes nos que participaron y detallaron cómo contribuyeron de manera amplia y efectiva na execución de les conductes”.[4]
Unidá de Busca de Persones daes por Desapaecíes
En rellación cola Convención Internacional pa la Protección de toles Persones escontra les Desapaiciones Forciaes, constitúi un avance’l que el nuevu gobiernu colombianu aceptare — n’agostu del 2022— la competencia del Comité de les Naciones Xuníes escontra la Desapaición Forciada, lo que va fortalecer la busca de les persones desapaecíes y la persecución d’esti crime escontra la humanidá.
La Comisión de Busca de Persones daes por Desapaecíes avanza na xera con más de 34.200 casos en cursu.
P’avanzar necesítase que les instituciones nacionales y territoriales coordinen el fluxu d’información y les aiciones de busca, sobre too nos territorios nos que’l conflictu armáu sigue, como asocede nos territorios del Pacíficu y nos fronterizos con Venezuela.
Comisión pal Esclaramientu de la Verdá
La Comisión pa la Verdá espublizó’l so informe final en xunu del 2022[5] col propósitu de que la sociedá sepa qué asocedió nel conflictu armáu internu y evite que se repita.
Creóse un Comité de Siguimientu y Monitoréu per siete años pa verificar el desarrollu de les recomendaciones de la comisión.
L’Informe constitúi un esfuerciu por esclariar les motivaciones y les responsabilidaes estraxudiciales de los intervinientes nel conflictu armáu, y tamién les consecuencies pa les víctimes y pa les instituciones cola fin de construyir un rellatu colectivu qu’ayude a sanar a la sociedá y qu’evite la repetición.
L’informe consta de diez volúmenes que se refieren a los afayos, conclusiones y encamientos, de los que una comisión va observar el desarrollu nos próximos siete años. Los demás volúmenes refiérense al rellatu hestóricu de la guerra, a los ataques a los drechos humanos y los sos responsables, contenío nel volume “Hasta la guerra tien límites”; la guerra nes rexones y escontra’l campesináu, recoyida nel volume “Colombia adientro”; el volume “Sufrir la guerra”, que trata sobre los impautos nes víctimes, ex-combatientes, comunidaes y la naturaleza; el volume de testimonios “Cuando los páxaros nun cantaben”; un volume étnicu, qu’aporta a la verdá de los puelos indíxenes, afrodescendientes, negros, raizales, palenqueros y rom; el volume “El mio cuerpu ye la mio verdá” sobre l’impautu nes muyeres y nes persones LGTBIQ+; el volume “Nun ye un mal menor”, sobre impautos na infancia y na adolescencia; y el volume “Colombia fuera de Colombia”, sobre más d’un millón de persones exiliaes pola guerra, ente elles les que pasaron pel refuxu del Programa Asturianu d’Atención a Víctimes de la Violencia en Colombia, qu’apurrió a la comisión los archivos de venti años d’exiliu.
L’Informe de la Comisión de la Verdá compleméntase col trabayu de la Xurisdicción Especial pa la Paz, que ta xulgando les responsabilidaes penales nos delitos graves cometíos dientro del conflictu armáu internu.
Reforma Rural Integral
La solución del problema agrariu ye crucial pa la paz.
El gobiernu espresó interés na compra de tierres de los empresarios ganaderos pa da-y al campesináu, y avanza na titulación de terrenos ermos ocupaos por families llabradores que los vienen esplotando dende hai décades.
La política antidrogues prioriza la sustitución voluntaria de los cultivos d’usu ilícitu –con un área que vieno aumentando— sobre los desañicios forciaos y sobre los riegos aéreos. Oriéntase a persiguir el tráficu más qu’al campesináu, lo que protexería los sos drechos.
El gobiernu nacional, per aciu d’un Proyectu d’Actu Llexislativu que reforma la Constitución Política, propunxo al Congresu de la República la creación d’una Xurisdicción Especial Agraria p’abordar los conflictos por tierres, iniciativa empobinada a cumplir l’alcuerdu de paz y a resolver una de les mayores fontes de confrontación.
Restitución de tierres
Les víctimes del conflictu reclamen más de 64.000.000 de díes de gües (8.000.000 d’hectárees) de tierra de les que les desaposiaron con violencia ente’l 1994 y el 2004.
“La Unidá de Restitución de Tierres lleva once años operando y nunca nun usó la facultá d’actuar d’oficiu énte el desaposiu territorial. Tenemos nueve años pa restituyir cerca de 84.000.000 de díes de gües (14.000.000 d’hectárees); va depender de la capacidá de la UNRT, de l’asignación económica y del compromisu del Congresu y de la fuercia pública, porque ye necesariu’l conceptu de los militares sobre seguridá pa los retornaos. Nestos últimos años na URT ñegábase’l 70% de les solicitúes, de les qu’hai unes 17.000, y hai unes 4.000 solicitúes de víctimes dende l’esterior a les que nun se notificaba y aplicáron-yos el desestimientu tácitu de la petición”.[6]
En diez años restituyéronse 4.560.000 díes de gües (570.000 hectárees). Los enzancos fueron la falta de voluntá de los gobiernos anteriores, les torgues burocrátiques impuestes pol Equipu d’Asuntos Ambientales, Minero-enerxéticos ya Infraestructura de la Unidá y la falta de seguridá pa los reclamantes.
La Unidá de Restitución informa que 7.791 sentencies de restitución beneficiaron a 85.588 persones, pero hai pocos avances na restitución de los territorios étnicos desapolinaos: de 822
solicitúes sobre territorios de puelos indíxenes y comunidaes negres, namás 235 avancen cola xusticia.
Capítulu étnicu y de xéneru
Hai mínimos avances nel capítulu étnicu y de xéneru conteníu nel alcuerdu de paz.
Nel Sestu Informe sobre’l Cumplimientu del Alcuerdu de Paz l’Institutu Kroc d’Estudios Internacionales de Paz de la Universidá de Notre Dame[7] señala como esperanzador que l’alcuerdu tea desarrollándose cinco años dempués de firmáu y recomienda ampliar la titulación de tierres al campesináu y garantizar la seguridá nos territorios.
Según esti informe l’alcuerdu de paz tien el 37% de les disposiciones n’avances mínimos y namás se cumplieron dafechu’l 13% de les 80 disposiciones.
La XIX Delegación Asturiana coincide cola Oficina de la ONX pa los Drechos Humanos al señalar retrocesos graves nos drechos de los puelos indíxenes y de les comunidaes negres, afectaos nel drechu a la vida, a la movilidá, al territoriu y al gobiernu propiu, nos departamentos d’Arauca, Cauca, Chocó, Córdoba, Huila, Nariño, Norte de Santander, Putumayo y Valle del Cauca.
L’enfoque de xéneru nel cumplimientu del alcuerdu de paz ta contempláu nos Planes de Desarrollu Territorial y nes midíes decidíes pa promover la participación de les muyeres n’espacios políticos de representación popular.
Situación col ELN
Ye un avance l’allanzamientu de los diálogos pa la paz col ELN en Caraques n’ochobre del 2022 y en México en marzu del 2023.
Pero la confrontación col ELN escaló a empiezos del 2023 col ataque de la guerrilla a una base militar en Saravena —el 14 de marzu—, y l’ataque a un grupu de militares nel Catatumbo, que dexó nueve militares muertos el 29 de marzu del 2023.[8]
El 10 de marzu del 2023 les delegaciones en representación del gobiernu y del ELN firmaron el documentu “Alcuerdu de México. Nueva axenda de diálogos pa la paz ente’l gobiernu de la república de Colombia y l’Exércitu de Lliberación Nacional”.
L’alcuerdu de México robla la voluntá de les partes pa buscar una solución política que ponga fin al conflictu armáu internu a partir d’una visión común de la paz, cola participación democrática de tolos sectores de la sociedá, con una alianza social y política que-y dea base a un alcuerdu nacional poles tresformaciones sociales nel que se reconoza a les víctimes, los sos sufrimientos y drechos, y nel que se construyan garantíes pa la seguridá y l’exerciciu de la política por parte del ELN, el desañiciu del paramilitarismu y aiciones humanitaries, con un cese billateral del fueu y de los enfrentamientos y un plan d’execución de los alcuerdos pa desarrollar lo pautao a la final del procesu de diálogu.
Na Mesa de Diálogu, amás de les delegaciones del gobiernu y del ELN, van tar los países garantes: Brasil, Cuba, Chile, México, Noruega y Venezuela, y como acompañantes la Conferencia Episcopal Colombiana y el Representante Especial designáu pol Secretariu Xeneral de la ONX.
Alcordóse crear un Grupu de Países d’Acompañamientu, Apoyu y Cooperación, nel que van tar Alemaña, España, Suecia y Suiza.
Les partes alcordaron nun usar la fuercia armada pa emburriar desarrollos na Mesa de Diálogos, y nun usar el procesu de paz pal fortalecimientu militar.
La prioridá pal movimientu social ye llograr que les partes alcuerden un cese billateral del fueu y de los enfrentamientos en tol país.
Los Drechos Humanos nel 2022
Una de cada dos persones defensores de los drechos humanos asesinaes nel mundiu nel 2022 yeren colombianes. Les cifres cuadrupliquen les agresiones rexistraes n’Ucraína, con cincuenta casos. https://www.europapress.es/internacional/noticia-colombia-concentra-casi-mitad-activistas-ddhh-asesinados-todo-mundo-2022-20230410202441.html
Nos dos últimos años la violencia asociada al conflictu armáu internu de Colombia agravóse y nun ameyoró col cambéu de gobiernu n’agostu del 2022.
Una de cada dos persones defensores de los drechos humanos asesinaes nel mundiu nel 2022 yeren colombianes. Les cifres cuadrupliquen les agresiones rexistraes n’Ucraína, con cincuenta casos.
L’Informe de Front Line Defenders precisa que nel 2022 asesinaron a 401 persones defensores de los drechos humanos en 26 países, munches d’elles involucraes na defensa de la tierra y del mediu ambiente.[9]
Llatinoamérica ye la rexón col mayor númberu d’ataques, encabezada por Colombia (189), siguida de México (45), Brasil (26) y Hondures (17). De les 189 persones asesinaes en Colombia nel 2022, 88 yeren dirixentes ambientales.[10]
“Nel gobiernu nun zarramos los güeyos delantre la realidá. Hai resistencies al cambéu en dalgunes autoridaes y en sectores de la fuercia pública. Hai torgues institucionales y ta trabayándose col presupuestu del gobiernu anterior, esto ye: coles manes ataes”.[11]
L’añu 2022 foi añu electoral. En marzu escoyóse’l Congresu de la República y en xunu ganó les elecciones presidenciales la coalición del Pautu Hestóricu, encabezada por GUSTAVO PETRO y FRANCIA MÁRQUEZ (2022-2026).
A lo llargo de 19 años la Delegación Asturiana de Drechos Humanos y Paz pudo constatar el fracasu de la política de seguridá basada nel usu de la fuercia armada y na doctrina del enemigu internu. El militarismu y el paramilitarismu nun llograron acabar col conflictu armáu internu y xeneraron una escalada de la violencia que se reflexa nes cifres d’ataques graves a los drechos humanos y al DIH, en munchos casos con responsabilidá d’axentes del Estáu.
El nuevu gobiernu cambió l’enfoque y fala de “seguridá humana”. Espresa voluntá pa reconocer y aplicar los mecanismos internacionales de drechos humanos y pa protexer a les comunidaes nos sos territorios, oxetivos que requieren del cambéu na doctrina del enemigu internu que vieno guiando a la fuercia pública, y d’aiciones efectives qu’esmantelen el paramilitarismu y les sos redes económiques y polítiques.
El Congresu y el gobiernu colombianu aprobaron l’Alcuerdu d’Escazú o Alcuerdu Rexonal sobre l’Accesu a la Información, la Participación Pública y l’Accesu a la Xusticia n’Asuntos Ambientales n’América Llatina y el Caribe, que contempla la protección del mediu ambiente y de les persones que lu defenden.
Colombia sigue siendo’l país del mundiu nel que más s’asesina ambientalistes previamente señalaos como responsables del atrasu nacional al oponese al desarrollu y al progresu prometíos poles empreses multinacionales, beneficiaries directes de la guerra y del estractivismu.
Tamién impulsó un proyectu d’Actu Llexislativu que se tramita nel Congresu de la República, reconociendo al campesináu como suxetu políticu de drechos de protección especial, dempués de lo cual va poder incorporase a la Constitución Política’l testu de la Declaración de la ONX sobre los Drechos de los Llabradores y d’Otres Persones que trabayen en Zones Rurales.
Al reconocer el drechu humanu a la paz el nuevu gobiernu comprometióse a cumplir l’alcuerdu firmáu coles FARC, destinando recursos pa la so execución nel Plan Nacional de Desarrollu y llanzando la “Política de Paz Total”, que pretende dialogar y pautar la paz cola guerrilla del ELN y coles disidencies de les FARC, y someter a la xusticia a los grupos paramilitares.
El 31 d’avientu del 2022 el gobiernu, per mediación del Decretu 2657 de 31 d’avientu del 2022, ordenó –a partir del 1u de xineru y hasta’l 30 de xunu del 2023— un cese’l fueu billateral con cinco organizaciones: les guerrilles ELN, la Segunda Marquetalia, l’Estáu Mayor Central, y colos grupos narco-paramilitares Autodefenses Gaitanistes de Colombia, AGC, y les Autodefenses de la Sierra Nevada.
Pero l’ELN esixó alcordar billateralmente los términos del cese’l fueu, polo que’l gobiernu decidió suspender los efectos xurídicos del decretu pa esti grupu y caltener los diálogos sobre cese’l fueu nel siguiente ciclu de negociación que siguió en ciudá de México nos entamos del 2023.
Al respeutive’l ministru del Interior espresó: “Invitamos a esta organización a declarar una tregua y caltener el cese y la non violencia, el gobiernu nun va arrenunciar a la busca del respetu pola vida pa construyir la paz total”.[12]
El 20 de marzu tamién se suspendió’l cese’l fueu col Clan del Golfu tres entamar paros armaos pa defender la minería illegal. “Ordené a la fuercia pública reactivar toles operaciones militares escontra’l Clan del Golfu. Suspéndese’l cese billateral con esti grupu al marxe de la llei”. “Nun vamos permitir que sigan semando esmolición y mieu nes comunidaes”.[13]
El conflictu social xeneráu pola inequidá y l’abandonu por parte del Estáu sigue ensin solución.
Les protestes sociales del 2021 y 2022 reprimiéronse con dureza.
Usóse a la fiscalía pa paralizar la protesta social per aciu de la xudicialización – criminalización. Nos primeros meses del 2022 polo menos a 110 persones priváronles de la llibertá, ente elles 58 acusaes pola fiscalía de delitos como conciertu pa delinquir, terrorismu, tortura, secuestru, intentu d’homicidiu; delitos graves formulaos pa disuadir sobre too a la población mozo de salir a protestar.
«L’usu d’acusaciones tan arreches pa persiguir conductes violentes durante les protestes supón una amenaza grave pa la promoción y protección de los drechos humanos y les llibertaes fundamentales y pa la llexitimidá de los marcos y lleis internacionales escontra’l terrorismu», afirmaron los espertos. «Tien un efectu amedranador y fomenta les campañes de descreitu escontra los movimientos de protesta nel país».[14]
El nuevu gobiernu ta abriendo canales institucionales de diálogu y reconoció la llexitimidá de la movilización social en defensa de los drechos humanos.
Dio órdenes a la fuercia pública de nun disparar sobre les persones movilizaes énte les evidencies d’un usu escesivu y desproporcionáu de la fuercia por parte de la Policía Nacional, sobre manera del Escuadrón Móvil Antialborotos (ESMAD).
“Amnistía Internacional documentó, nesos anteriores informes, casos d’ataques por parte de civiles armaos a persones manifestantes, usu d’armes mortales por parte d’axentes estatales y traumes oculares. Estos fechos constitúin vulneraciones de los drechos a la integridá física, a la prohibición de tortura y a la llibertá de reunión pacífica, ente otros. Denuncióse l’usu escesivu y desproporcionáu de la fuercia por parte de la Policía Nacional, sobre manera del Escuadrón Móvil Antidisturbios (ESMAD), como manera de reprimir violentamente la decisión de protestar, produciendo daños físicos y psicosociales a miles de manifestantes”.[15]
Los dos últimos años fueron los peores en materia de drechos humanos dende la firma del alcuerdu de paz coles FARC nel 2016, por causa les aiciones de los grupos armaos non estatales (guerrilles) y de les organizaciones criminales (grupos paramilitares, bandes, etc.) que coparon los territorios que controlaben les FARC.
L’Estáu incumple la so responsabilidá como garante de los drechos humanos fundamentales.
Hai denuncies sobre’l caltenimientu de la complicidá d’axentes de la fuercia pública con grupos armaos en tol país.
La violencia sigue usándose pa xenerar mieu y someter a les comunidaes que son confinaes, amenazaes, esllarigaes, desapolinaes de los sos territorios.
Siguieron les masacres, les desapaiciones forciaes de persones, los actos de violencia sexual, l’allistamientu de menores.
El gobiernu colombianu llexitimó la defensa de los drechos humanos y la protesta social, pero nun ye quien a garantizar el drechu a la vida, nin otros drechos fundamentales recoyíos na Constitución Política, sobre manera nes rexones baxo conflictu armáu internu, nes que los poderes fácticos imponen les sos propies normes, creando un “para-Estáu” o “Estáu paralelu”.
REXONES VISITAES
NARIÑO
Ye ún de los departamentos con mayores niveles de violencia asociada al conflictu armáu internu, qu’afecta sobre too a los puelos indíxenes, a les comunidaes afrodescendientes, al campesináu y a los firmantes de la paz.
Los puelos indíxenes awá y eperara-siapidara denuncien qu’ente’l 60 y el 70% del so territoriu ta semáu de mines antipersona, lo qu’enzanca la so movilidá p’abastecese y agrávase col confinamientu qu’imponen los grupos armaos. Polo menos 26 persones resultaron mancaes pola esplosión de mines antipersona nos caminos, les cases y nos alredores de les escueles del puelu awá. Reclamen desmináu humanitariu urxente.
Pa la UNIPA, Unidá Indíxena del Puelu Awá: “Los actores armaos siguen operando coles sos lóxiques de muerte y axorizu, ensin control dalu. Xeneren esllarigamientos forciaos, intimidaciones, amenaces, confinamientos, instalación de mines antipersona, control de los caminos y homicidios”.[16]
El 3 de xunetu del 2022 asesinaron nuna reunión de drechos humanos al gobernador del resguardu Inda Sabaleta del puelu indíxena awá JUAN MOREANO y dos guardies indíxenes.[17]
L’Asociación de Cabildros Indíxenes Eperara – Siapidara de Nariño, ACIESNA, denuncia la continuidá de la violencia nos sos territorios, a pesar del cese’l fueu decretáu pol gobiernu.
Les víctimes del Pacíficu reclamen apoyu pa la busca de los sos desapaecíos.
Les comunidaes de la Costa del Pacíficu reclamen tar presentes nes meses de paz, denuncien el sufrimientu específicu de les muyeres (asesinaes, abusaes, desaposiaes, desapaecíes), y denuncien los esllarigamientos forciaos recientes en Playón, Magüí, La Tola, Altu Mira y Frontera.
Les comunidaes del Altu Mira y Frontera informen del afayu d’una fuexa común na collación Casas Viejas y denuncien que lleven más d’un añu de confinamientu y pagando estorsiones a los grupos armaos pa poder abastecese.
Dos díes antes de la llegada de la delegación asturiana, el domingu 12 de marzu del 2023, secuestraron y asesinaron a JULIO PALACIOS nuna área controlada pol Exércitu Nacional, que nun actúa “porque los autores escuenden les armes”. Los militares tampoco actúen cuando los grupos armaos imponen les autoridaes que llevarán la representación comunitaria.
Les comunidaes denuncien la impunidá qu’arrodia a los autores de la masacre d’El Tandil, cometida por componentes del, qu’ametrallaron a les comunidaes movilizaes escontra’l desañiciu forciáu de coca’l 5 d’ochobre del 2017.
El 11 de febreru del 2023 en Mallama asesinaron al dirixente indíxena MARCOS LÓPEZ, representante llegal del movimientu Autoridaes Indíxenes de Colombia, AICO.
Les alertes tempranes nun se tienen en cuenta y los esllarigamientos forciaos y masivos repítense cada añu. Les comunidaes denuncien que’l conceyu de Tumaco nun tien instalaciones p’agospiar a les persones esllarigaes, nin hai interés del alcalde pa faelo.
Les denuncies señalen que na rexón de Tumaco y otres de la Costa del Pacíficu son cotidianes les agresiones escontra les muyeres de la rexón y escontra les muyeres de nacionalidá venezolana a les que someten a esplotación llaboral y sexual nel entornu de les plantaciones de coca dirixíes por “colonos”, que de día faense llamar llabradores y de nueche militaríen nes guerrilles.
El Colectivu Orlando Fals Borda, que trabaya na zona de Tumaco na busca de persones daes por desapaecíes, llogró entregar de manera digna 191 cuerpos. Otros 757 cuerpos alcontráronse en zones de Pasto-Tumaco-Ipiales, de los que pudieron entregar 85.
La Mocedá Comunista Colombiana, JUCO, denunció la prisión de los xóvenes dirixentes sociales ANDRÉS DUQUE y BREMEN HINESTROZA, integrantes del colectivu “Los Ensin Techu – Texíu Popular”, acusaos d’atacar a la fuercia pública nel marcu de movilizaciones populares. Estes persones taben propuestes pa ser “voceros de paz” dientro de la política de paz total.
El 5 de payares del 2022 el grupu narco-paramilitar Autodefenses Gaitanistes de Colombia, AGC, secuestró al defensor de los drechos humanos WILLIAM LEONARDO CASTRO MUÑOZ, fundador y representante llegal de l’Asociación de Víctimes Vida, Dignidá y Futuru, ASVIDIF, y promotor comunitariu de paz certificáu pol Ministeriu del Interior, integrante de la Plataforma d’Organizaciones Sociales, de Víctimes y Defensa de los Drechos Humanos de Nariño y del Equipu Motor de la Mesa Territorial de Garantíes de Nariño.[18] Trés meses antes del secuestru la Unidá Nacional de Protección, UNP, quitó-y el sistema de protección.
En Nariño van 59 firmantes de paz asesinaos y 97 esllarigaos de manera forciada por amenaces de muerte.
Los firmantes del alcuerdu de paz tán abandonando los Espacios Territoriales de Capacitación y Reincorporación, ETCR, de Nariño por falta de condiciones, ausencia d’apoyos pa la reinserción y falta de garantíes pa preservar la vida.
PUTUMAYO
El Putumayo ye un departamentu fronterizu con Ecuador y Perú. Ye una rexón abandonada pol Estáu, inmersa nel conflictu armáu nel qu’intervienen guerrilles, paramilitares y fuercia pública, y na que’l 42% de la población pue consideráselo víctima según les autoridaes.
Polo menos 10.000 víctimes del Putumayo nun recibieron reparación.
Los enfrentamientos de los últimos cuatro años ente’l grupu armáu Comandos de Frontera y el grupu armáu Carolina Ramírez del Estáu Mayor Central xenera perxuicios graves a la población civil, que tien mieu de falar de lo que pasa na so rexón.
A finales de payares del 2022, nuna confrontación ente’l Frente Carolina Ramírez y los Comandos de Frontera, produxéronse ente 28 y 40 muertos. Sacaron a decenes de families del correximientu José María. La comunidá movió los cuerpos nun volquete pa facer recuentu dada la ausencia de les instituciones.
Medren les amenaces de muerte escontra la dirixencia social. La Rede de Drechos Humanos del Putumayo, Piamonte (Cauca) y Cofanía Jardines de Sucumbíos (Ipiales, Nariño) denunció’l 27 de marzu del 2023: “Les/os defensores de drechos humanos siguimos siendo víctimes de fuertes acusaciones, más entá cuando vienen del aparatu represor, al que namás-y importa la inestabilidá social, les perres y el poder nel interior de los territorios”.[19]
Les organizaciones sociales señalen a los Comandos de Frontera como los responsables de la mayoría d’ataques escontra la dirixencia social y firmantes del alcuerdu de paz: masacres, esllarigamientu forciáu y asesinatos de población civil. Sedríen los responsables de les amenaces de muerte escontra la dirixencia de la Zona de Reserva Llabriega, La Rede de DD. HH. del Putumayo, la Mesa Rexonal d’Organizaciones Sociales, y del asesinatu de dirixentes sociales como MARCO RIVADENEIRA, YORDAN TOVAR, EDGAR HERNÁNDEZ, JOSÉ EDISION VARGAS, DIEGO JAIR ORBES, la cabezalera del puelu indíxena kamentsa MARÍA BERNARDA JUAJIBIOY y los dirixentes afros del Conceyu Comunitariu Lliberación y Futuru FAUSTINO y JONÁS CARABALÍ, ente otros.[20]
El profesoráu del Putumayo denunció 52 amenaces de muerte nel primer trimestre del 2023 y l’esllarigamientu forciáu de maestros/es causando un dañu enorme a la infancia y a la mocedá del Putumayo, que ve tovía más amenorgaes les sos posibilidaes d’acceder a educación básica.
Nun hai condiciones materiales pa la reinserción de quien firmaron la paz, nin hai garantíes pa les sos vides, polo qu’opten por marchar del espaciu territorial destináu a la so reincorporación.
La empresa minera canadiense Libero Cobre recibió autorización pa esplotar la zona del Altu Mocoa, a pesar del refugu de les comunidaes por afarar el mediu ambiente y poner en peligru l’abastecimientu d’agua a zones poblaes. La construcción de la vía Mocoa – San Francisco, una infraestructura al serviciu de les empreses mineres, ta xenerando esbarrumbes y llenes.
Alredor de la minería, de la coca y de les petroleres hai focos d’esplotación sexual de muyeres. Los grupos armaos executen aiciones de “llimpieza social” nes qu’ataquen a la población civil, a les muyeres y al colectivu LGTBI+.
Nes protestes del estallíu social del 2021 nel conceyu de Villagarzón la fuercia pública asesinó al estudiante del puelu indíxena nasa JORDANY ROSERO, cerca del pozu Costayaco 10 de la petrolera canadiense Gran Tierra Energy.
A PABLO PANDURO COQUINCHE, gobernador del puelu kichwa del resguardu indíxena Bajo Remanso del conceyu de Puerto Leguízamo, asesináronlu’l 28 de marzu del 2022 tropes del exércitu nuna masacre que quixeron presentar como un operativu escontra les disidencies de les FARC.
El 25 d’abril asesinaron na collación José María, del conceyu de Puerto Guzmán, al firmante de paz JUAN JOSÉ CHILITO MARTÍNEZ.
Nel 2022 espulsaron con violencia a lo menos a 2.600 persones del Putumayo. L’ACNXR informó del tránsitu migratoriu abondosu, ente elles 12.000 persones venezolanes.
Hai abandonu de les víctimes d’espulsiones masives y vacíos na protección de la infancia, yá que nun hai oficines del Institutu Colombianu d’Acomodu Familiar, ICBF.
Árees que diben ser reserva llabriega fueron desapolinaes con violencia. El 80% de los cultivos de coca de la rexón nun son de los llabradores, sinón de los grupos armaos, que tamién tienen la minería illegal.
La coordinación del puelu awá nel Putumayo denuncia la repercusión en 46 comunidaes, resguardos y cabildros por causa los grupos armaos qu’allisten xóvenes, presionen pa que se seme coca, imponen la minería illegal y desaposien de l’autoridá a los gobernadores indíxenes. Estes denuncies ampliáronse na reunión de la Coordinadora Nacional de Cultivadores de Coca, Amapola y Marigüana, COCCAM, que defende la sustitución de los cultivos d’usu ilícitu.
La conseyería de “El suañu del puelu nasa del Putumayo” y los sos 38 cabildros denuncien les llaceries pol conflictu: confinamientos, aumentu de los cultivos d’usu ilícitu y el dañu ambiental de les petroleres, que tán baltando árboles indiscriminadamente, xeneren grupos armaos nuevos y desestabilicen los territorios con amenaces, masacres y esllarigamientos.
Habitantes de la collación Medio Afán denunciaron que lleven 18 años de protestes y movilizaciones polos efectos del “basureru a cielu abiertu”, con residuu de los Conceyos y de les petroleres, con padecimientos sanitarios y ambientales graves pa tola cuenca del ríu Mocoa.
Una delegación del CRIC del Cauca, presente nel resguardu Aguadita, denunció l’aumentu del 200% del área semada con cultivos d’usu ilícitu; l’asesinatu de 15 kiwe thegnas o guardies indíxenes, la desapaición forciada d’un comuneru, los incumplimientos del cese’l fueu y la presencia creciente de grupos armaos nos núcleos urbanos, nos qu’amenacen, estorsionen, acosen, allisten y asesinen.
PITALITO (HUILA)
La ciudá de Pitalito alberga 33.300 víctimes d’esllarigamientu forciáu de les 214.000 rexistraes nel departamentu del Huila.
El cabezaleru social y ex-alcalde de Timaná PEDRO NEL JIMÉNEZ STERLING foi víctima d’un nuevu atentáu nel que, amás, quemaron la vivienda de la so finca na zona rural de la villa de La Gaitana, el 27 de xunetu del 2022. Estos atentaos tán rellacionaos cola so oposición a proyectos mineros nel sur del Huila.
La inseguridá nes cais de la ciudá de Pitalito orixínase na esclusión y nel microtráficu.
Los habitantes tomaron la xusticia pola propia mano y mataron a siete lladrones. Estes aiciones de violencia urbana son el xerme de grupos armaos nuevos, afirma un ex-conceyal que tevo que se refuxar n’Italia “por tener sío delegáu de Pitalito nes conversaciones del Caguán. Regresé, pero la familia non”.
Dende la Mesa de Víctimes afírmase que nun hai midíes de protección, y que munches víctimes acuden ensin declaración previa de la so situación delantre la Personería, polo que nun puen faer nada.
Les víctimes del esllarigamientu forciáu desarrollen enfermedaes derivaes de la marxinalidá y del estrés y nun tienen ayudes del Estáu frente al cáncer, lupus, Parkinson, epilepsia, etc.
CASANARE
El departamentu de Casanare foi zona de conflictu social pola inequidá que xenera la ganadería estensiva y los monocultivos d’arroz y palma aceitero. Y ye rexón de conflictu internu agraváu nos últimos cuarenta años pola llegada de les multinacionales del petroleu que cunten con batallones del Exércitu Nacional al so serviciu y fueron acusaes de financiar el paramilitarismu.
Los efectos de la industria petrolera nes comunidaes y nos trabayadores caltiénense.
Según la Comisión de Drechos Humanos de la Unión Sindical de los Obreros del Petroleu: «La esplotación petrolera nel Casanare tevo acompañada de falcatrúes, violencia y negación de drechos fundamentales. Nesti contestu realicen el trabayu empreses como BP, ECOPETROL y OCENSA. La Unión Sindical Obrera nunca pudo tener presencia directa por causa les amenaces paramilitares y les acusaciones de los militares».[21]
La presencia creciente de los grupos paramilitares na rexón reconocióla EFRAÍN GARCÍA HERNÁNDEZ, comandante de la Policía Nacional del Casanare. “Presta que corroboren la información que reciben. Nel Casanare hai presencia de varies organizaciones armaes y tócamos enfrentar situaciones difíciles. L’ELN, disidencies de les FARC y paramilitares en Salinas y Sácama, cerca d’Arauca, y el Clan del Golfu – AGC lligaos al narcotráficu en Villanueva, Maní, Tauramena, Monterrey, nel sur del departamentu”.[22]
Les aiciones paramilitares y los enfrentamientos ente grupos armaos xeneren esmolición nes comunidaes y ponen en peligru a la dirixencia social que sobrevivió a les persecuciones.
Preocupen les acusaciones escontra los asentamientos humanos de les ciudaes de Yopal y de Nunchía, que tachen de ser “guerrilleres” a les organizaciones sociales, a los procesos sociales y a les muyeres que se fixeron cargu d’autoxestionar una vivienda pa les families, dau l’abandonu del Estáu. La Fiscalía 28 de Yopal nun toma en serio les acusaciones alegando que son “problemes de convivencia”.[23]
ARAUCA
El departamentu d’Arauca, frontera con Venezuela, ye una de les rexones del país con niveles más altos de violencia asociada al conflictu armáu internu dende va décades.
Al movimientu social araucanu siguen calumniándolu y persiguiéndolu: estierru, prisión o muerte por defender el territoriu. Ye un exemplu de lo que pasa nel país.
El Puestu de Mandu Unificáu pola Vida n’Arauca, convocáu pol gobiernu nacional, ye un espaciu pa la protección de la dirixencia social del que delles organizaciones sociales se retiraron porque consideren inaceptable la influyencia de les petroleres.[24]
La confrontación ente l’ELN y les disidencies de les FARC agravó’l riesgu pa la dirixencia social araucano convertío n’oxetivu militar. Los ataques a persones (doce dirixentes asesinaos nel últimu añu), cases (la residencia del dirixente comunal JHONY DIAZ atacáronla con granaes), organizaciones ya infraestructures civiles (dinamitaron la sé de les organizaciones sociales en Saravena), atenten escontra’l DIH y asoceden nuna ciudá como Saravena, copada pola fuercia pública.
“Preocúpamos la violencia estrema en Saravena, qu’afecta a los sos 60.000 habitantes, dispersos en 74 collaciones. Hai un aumentu de la desapaición forciada de persones qu’acaben en muertos. Nel 2023 yá van ocho persones, ente elles dos venezolanos. Hai un aumentu de la desapaición forciada de persones y los familiares nun lo denuncien por mieu. Amás, la población nun quier acercamientos cola fuercia pública polos sos antecedentes. Tenemos quince asentamientos urbanos informales constituyíos sobre too por venezolanos. La migración venezolana agrava la situación d’inseguridá”.[25]
Na entrevista con suboficiales del Grupu de Caballería Mecanizáu Revéis Pizarro espresaron: “Equí falta tropa. Tenemos orde de nun faer operaciones ofensives, sinón d’estabilidá. Adelantamos un Plan Escudu pa protexer civiles, amás de protexer la infraestructura petrolera. Equí hai guerrilla del ELN, pero nun hai paramilitares. Saravena tien varios corredores estratéxicos que lleguen a la ciudá y nun somos quien a controlalo too”.[26]
SUMAPAZ
La XIX Delegación Asturiana sostuvo en Bogotá una entrevista col Sindicatu de Trabayadores Llabriegos de Sumapaz, SINTRAPAZ.
Sumapaz ye una llugar de monte con economía llabradora nel territoriu de Bogotá distritu capital. Per décades foi una zona de conflictu armáu y de disputa ente empreses mineres y por intereses d’empreses que queríen privatizar les reserves d’agua de la metrópoli capital.
El campesináu organizáu en SINTRAPAZ opúnxose y desacreditáronlo, persiguiéronlo, amenazáronlo. Munches persones fueron deteníes y otres asesinaes, pero con too y con eso, llograron cola so resistencia que’l nuevu gobiernu decretara la creación de la Zona de Reserva Llabriega.
Nel páramu de Sumapaz el Batallón de Monte caltién dos bases con miles de militares a menos de 500 metros de centros poblaos, incumpliendo normes del DIH.
1-. Ataques a la dirixencia social, persistencia del paramilitarismu
Nel 2022 agraváronse los ataques y l’asesinatu impune de persones con autoridá social, al tiempu que medró’l control narco-paramilitar nos territorios que dexaron les FARC al desmovilizase.
“La fuercia pública nun ta protexendo de manera efectiva a les comunidaes y los sos representantes. Hai un vacíu nos territorios p’atender problemes d’esclusión, inequidá, polo que nun ye abondo cola sola presencia militar. Hai 160 conceyos con niveles de riesgu mui altu de sufrir ataques graves a los drechos humanos, dalgunos visitólos la delegación asturiana, como Tumaco, Arauca, Saravena y otros. La violencia ye constante y agudizóse n’abril y n’ochobre del 2022. El Plan d’Emerxencia del nuevu gobiernu tovía nun incide na disminución de los ataques. Hai un patrón d’ataques escontra los integrantes de les Xuntes d’Aición Comunal en rexones del Cauca, Nariño, Arauca, Putumayo, Chocó, Magdalena Mediu, y escontra los puelos indíxenes, pa desarticulalos. Los ataques na so mayoría provienen d’axentes armaos non estatales. Les instituciones locales nun cambiaron la so mentalidá frente a ciertes violencies, y la fuercia pública nun respuende adecuadamente al conceptu de “seguridá humana” del nuevu gobiernu que reemplaza’l de “seguridá democrática” de les alministraciones anteriores. Colombia tien normatividá, pero nun hai coordinación, nin capacidá práctica. Ye previsible esti añu un escenariu d’aumentu de la violencia venceyada a los procesos electorales nos territorios”.[27]
Nel Casanare y nel Meta —como n’otros departamentos— el paramilitarismu aumentó’l control gracies a la financiación del narcotráficu colos llaboratorios móviles, y poles estorsiones.
En Casanare recibimos denuncies por aliances col paramilitarismu por parte de petroleres como Gran Tierra, Frontera Energy y Parex Resources, que taríen apoyando la entrada de los paramilitares en Támara, Yopal, Sácama, Salinas y Nunchía.
Les agresiones graves escontra la dirixencia social queden impunes na so mayoría. En dellos casos la fiscalía identificó al agresor, pero non a los autores intelectuales o enguizadores de les agresiones.
La violencia mortal, selectiva y sistemática escontra la dirixencia social, escontra les persones que, faciendo acopiu de valor, “falen en nome de toos”, busca desorganizar a les comunidaes a les que pretenden controlar mediante’l terror desatáu polos grupos armaos al serviciu del narcotráficu, de la gran minería y de los agro-negocios.
Gran parte de les agresiones mortales y de les amenaces de muerte impunes escontra la dirixencia social provienen de grupos paramilitares como les Águiles Negres, el Clan del Golfu – Autodefenses Gaitanistes de Colombia AGC y otros grupos que persiguen a quien defende territorios y drechos humanos. Munches amenaces de muerte cúmplense.
Según INDEPAZ[28], nel 2022 asesinaron a 189 persones con autoridá social nos sectores cívicu, llabrador, indíxena, ambientalista y sindical, amás de 42 firmantes del alcuerdu de paz, pa un total de 231 persones, lo que constitúi una de les cifres más altes de los últimos años y una de les peores del mundiu.
“N’Arauca asesinaron a 13 cabezaleros sociales nel últimu añu. Les amenaces de muerte escontra’l profesoráu, afecta a la educación y dexó ensin clases a unos 10.000 neños/es”.[29]
Nel 2022 agraváronse los ataques mortales a persones con autoridá nes Xuntes d’Aición Comunal al pasar de 13 asesinaos nel 2021 a 52 nel 2022. Estes agresiones tán na dinámica de controlar el territoriu y les comunidaes per mediación del terror en departamentos como Arauca, Cauca, Bolívar y Putumayo.[30]
El númberu altu d’amenaces, agresiones y asesinatos dexen al descubiertu les deficiencies del sistema de seguridá a cargu de la Unidá Nacional de Protección, organismu nel que se descubrió una rede de corrupción qu’involucra mandos de la fuercia pública y empreses proveedores d’elementos de seguridá.
El paramilitarismu creció y sigue baxo diferentes nomes siendo l’exércitu priváu de los carteles del narcotráficu, los ganaderos, los agronegociantes y les empreses multinacionales, al tiempu que ye una ferramienta pa la guerra contrainsurreuta qu’apliquen sectores de la fuercia pública escontra la dirixencia social y escontra la población civil.
La dirixencia social colombiano sigue ensin garantíes pa preservar la vida, polo que seis persones amenazaes de muerte van ser acoyíes pol Programa Asturianu d’Atención a Víctimes de la Violencia en Colombia.
AURA CARABALÍ, cabezalera social, defensora de los drechos humanos, integrante del Movimientu de Víctimes de Crímenes d’Estáu, MOVICE capítulu Cauca, de la Corporación Colectivu Muyeres Trescendiendo Pola Paz, y de l’Asociación de Víctimes Renacer Sieglu XXI. Tán persiguiéndola y amenazándola, xunto cola familia, varios grupos armaos.
CRISTIAN NARVÁEZ, dirixente del sindicatu SINTRAEMSDES – CUT, amenazáu de muerte por fundar el sindicatu del que-y esixen desafiliase, o lu maten.
DAVID MAYORGA, defensor de drechos humanos, cabezaleru social y comunal, director de CORPOINDH. Vien siendo persiguíu en Santander y el Magdalena Mediu, amenazáu de muerte y declaráu oxetivu militar pol Clan del Golfu.
LADY RIASCOS, cabezalera social, autoridá étnica, representante llegal del Conseyu Comunitariu La Nupa del ríu Caunapí, Tumaco (Nariño). Defensora de los drechos humanos, integrante de la Rede de Drechos Humanos del Pacíficu Nariñense y Pie de Monte Costeru, REDPHANA; delegada nel Espaciu Nacional de Consulta Previa pa comunidaes, NARP; componente de la Comisión de Siguimientu del Alcuerdu de Paz. Amenazada de muerte dende’l 2019 por encabezar reclamaciones de tierres y por impulsar aiciones de protección del mediu ambiente.
MARGARITA JAIMES ye defensora de los drechos humanos, profesora universitaria y dirixente del Sindicatu de Defensores de Drechos Humanos de la Defensoría del Puelu, SINDHEP – CUT, sección Atlánticu. Ta siendo acosada y amenazada pol so llabor na atención a otres persones con autoridá social amenazaes de muerte.
MIGUEL ÁNGEL ORTIZ, cabezaleru social y defensor de los drechos humanos, integrante de la Vixilancia Ciudadana “Soi xoven de Buenaventura”, componente de la organización Fundación Visión Pacíficu, que trabaya pa evitar l’allistamientu de menores.
A los ataques p’asesinar a la dirixencia social súmense los montaxes xudiciales que fai la fiscalía en departamentos como Casanare pa romper la llucha de les comunidaes escontra les petroleres. Ye’l casu de FREDY FIGUEROA, FERNEY SALCEDO, MIGUEL RINCÓN, HERMES BURGOS, CARLOS ROMERO, MYRIAM AGUILAR, MIGUEL DAZA y CARMEN SALCEDO.[31]
A otros dirixentes sociales amenácenlos de muerte y oblíguenlos a marchar del territoriu, como’l cabezaleru llabriegu GILBERTO VARGAS.
Al sacerdote LUIS ALBEIRO CAMACHO, de la parroquia La Bendición de Yopal, amenazólu de muerte’l paramilitar conocíu como “John Calzones”, ensin que la UNP ordene protección.[32]
En dalgunes rexones del país, como en Casanare, les disidencies de les FARC sumáronse a les amenaces de muerte que manifiesten los paramilitares escontra la dirixencia social.
“N’Arauca les disidencies de les FARC atacaron al estilu paramilitar l’edificiu de les organizaciones sociales de Saravena y llanzaron granaes escontra la Empresa Comunitaria d’Acueductu, Cantarelláu y Aséu de Saravena. Tán usándose muyeres y neños p’atacar centros y cases”.[33]
Cuando la delegación asturiana llegó a Colombia’l 12 de marzu del 2023 contabilizábense por INDEPAZ 15 masacres, 15 cabezaleros sociales y un firmante de paz asesinaos. Cuando la delegación regresó, doce díes más tarde, los datos yeren de 20 masacres, 17 cabezaleros sociales y un firmante de paz asesinaos, lo que da una idea de la cotidianidá y sistematicidá de los ataques.
2-. Execuciones estraxudiciales y masacres
El mieu tamién lu usaron militares y policíes pa someter a la población.
Gracies al trabayu de la Xurisdicción Especial pa la Paz vieno llanzándose verdá sobre la muerte de delles de les 6.402 persones qu’asesinó l’Exércitu Nacional y presentaes como “guerrilleros daos de baxa en combate” nos dos gobiernos d’ÁLVARO URIBE VÉLEZ.
El reconocimientu d’estos crímenes escontra la humanidá polos sos executores va permiti-yos acceder a una reducción de la pena y evitar la competencia de la Corte Penal Internacional.
Va ser el casu de los once militares identificaos na primer resolución de conclusiones de la XEP qu’esperen sentencia na modalidá de xusticia transicional dende’l Tribunal de Paz.
Ente los militares acusaos que reconocieron responsabilidá nes execuciones estraxudiciales ta’l xeneral Paulino Coronado Gámez, ex-comandante de la Brigada 30; los coroneles (r) Santiago Herrera Fajardo y Rubén Darío Castro Gómez, comandantes de la Brigada Móvil 15; el teniente coronel retiráu Álvaro Diego Tamayo Hoyos, comandante del Batallón d’Infantería Nu. 15 ‘Xeneral Francisco de Paula Santander’ (BISAN) d’Ocaña; el teniente coronel Gabriel de Jesús Rincón Amado, ex-oficial d’operaciones de la Brigada Móvil 15; y el teniente coronel Juan Carlos Chaparro, ex-xefe d’operaciones y ex-comandante encargáu del Batallón Francisco de Paula Santander. Tamién fueron acusaos oficiales d’intelixencia.[34]
La fuercia pública foi denunciada en 19 departamentos del país pol asesinatu de 71 persones civiles nel 2022, dalgunes d’elles mientres exercíen el drechu de protestar. El Ministeriu de Defensa aceptó delantre la OACNXDH abrir investigaciones en 30 casos.[35]
La Rede de Drechos Humanos del Putumayo denunció l’asesinatu por tropes del Exércitu Nacional —el 28 de marzu del 2022— d’once persones civiles na collación Alto Remanso, conceyu de Puerto Leguízamo (Putumayo). Los militares amazcararon de guerrilleros, dispararon escontra la población civil y manipuliaron la escena del crime.[36]
El 25 de xunetu del 2022, integrantes de la Policía Nacional baxo les órdenes del teniente coronel BENJAMÍN NÚÑEZ JARAMILLO, retuvieron, torturaron y asesinaron a tres mozos nel correximientu Chochó, departamentu de Sucre: JESÚS DÍAZ, de 18 años d’edá; JOSÉ ARÉVALO, de 22, y CARLOS IBÁÑEZ, de 26 años.
Les masacres siguieron y agravaron nel 2002.
Según los datos del ACNXDH cometiéronse 94 masacres nes que perdieron la vida 321 persones, de les que 270 yeren homes, 30 muyeres, 14 neños y 7 neñes.[37] De les persones asesinaes en masacres, 27 víctimes yeren integrantes de los puelos indíxenes (24 indíxenes y 3 afros).
Los departamentos más afectaos por masacres, la mayoría cometíes por grupos narco-paramilitares o bandes criminales fueron: Antioquia, Cauca, Nariño y Valle del Cauca. En Nariño, Putumayo, Cauca, Norte de Santander y Chocó hebo masacres escontra persones y comunidaes opuestes a los cultivos de fueya de coca.[38]
3-. Población en situación d’esllarigamientu
Nel 2022 siguió l’esllarigamientu forciáu de persones. Polo menos a 82.862 persones obligáronles a salir con violencia de les sos cases y más de 102.000 persones fueron sometíes a confinamientu nos sos territorios.
La mayoría de los esllarigaos y de les persones confinaes son integrantes de los puelos indíxenes y de les comunidaes afrodescendientes. “Los departamentos más afectaos polos esllarigamientos y confinamientos son Arauca, Cauca, Chocó y Nariño”.[39]
La ONIC insistió en que nenguna de les midíes decidíes por Colombia pal otorgamientu de drechos a la población migrante proveniente de Venezuela contién disposiciones con enfoque étnicu diferencial, lo qu’afecta directamente a puelos binacionales y a otros que se vieron forciaos a emigrar.[40]
4-. Persones privaes de la llibertá. Tortura, tratu cruel, inhumanu o degradante
La delegación asturiana pudo volver a les alcárceles zarraes tres la pandemia. Visitóse la prisión de La Picota en Bogotá.
Comprobóse la continuidá del estáu de coses inconstitucional declaráu pola Corte Constitucional nes Sentencies T-388 del 2013 y T-762 del 2015.
Más de 130.000 persones tán privaes de la llibertá en Colombia, sometíes a niveles altos d’apetiguñamientu nes alcárceles, nes estaciones de policía y en centros de detención transitoria, sometíes a amontonamientu, con graves restricciones d’accesu al agua potable y nula atención sanitaria, sometíos a inxerir alimentos en mal estáu o simplemente obligaos a aguantar fame, como denunciaron el 31 de marzu del 2023 los presos de la prisión de Cómbita.
Siguieron les denuncias por tratu cruel, inhumanu y degradante nes prisiones de Colombia.
El Movimientu Nacional Carcelariu espresó con protestes en varies alcárceles el llamáu de les persones privaes de la llibertá pa que se respete la so dignidá y que cesen actos de violencia, abusos sexuales, usu desproporcionáu de la fuercia, tortura y aisllamientu per periodos prollongaos.
Les denuncies recibíes señalen que l’apetiguñamientu y el maltratu nos centros de detención preventiva allugaos nes estaciones de policía son peores que nes alcárceles.
Los presos por delitos políticos denunciaron la falta d’atención médica, la mala alimentación y l’amontonamientu como xeneradores de violencia y de descontentu, que s’espresa en fuelgues nes prisiones de La Dorada, Palo Gordo y Jamundí, y que’l restu de la población recluso que s’axunta nel Movimientu Nacional Carcelariu ta coordinándose colos movilizaos.
Dientro de la prisión La Picota la delegación asturiana alcontró un cadabre tiráu ente plásticos, muerte que nun se rexistró na pantalla correspondiente y que —según los presos— forma parte del ocultamientu, estratexa qu’aplicaron los penales na pandemia cuando les protestes de los presos se reprimieron con un saldu de 84 reclusos muertos y 200 firíos.
Los deteníos calculen que’l númberu de muertos en prisión dende’l 2018 supera la cifra de 4.000 persones, asuntu que se proponen abordar si se crea la Mesa Nacional Carcelaria.
Prisioneros integrantes del ELN denunciaron que’l gobiernu incumple’l compromisu de mandar a les cases “a morrer” a siete prisioneros mui graves y piden la llibertá pa otros cuarenta que tán graves. Denunciaron les pésimes condiciones de reclusión de les muyeres n’otres prisiones nes qu’hai tovía más opacidá de la situación que se vive dientro.
5-. Muyeres, infancia, mocedá, víctimes, población LGBTI
La violencia basada en xéneru agravóse nos territorios baxo conflictu armáu y nes rexones de frontera con Venezuela, Ecuador y Panamá. Neses rexones son cotidianos los feminicidios y el treslláu de muyeres y de neñes a rexones del Chocó y de Nariño, forciaes a combatir, a trabayar o con fines d’esplotación sexual.
La población sometío a control mediante’l mieu y el confinamientu tien nes muyeres, nes neñes, na infancia y na población LGBTIQ+ les principales víctimes de la esclavitú sexual, de les violaciones y de les restricciones a la llibre espresión.
“Aproximadamente 1 de cada 4 casos de violencia basada en xéneru nel marcu de la protesta social inclúi fechos de violencia sexual, na que los agresores instrumentalicen los cuerpos de les muyeres y de les persones LGBTI como una estratexa de poder y de control frente a la so participación nel marcu de la protesta social. (…) en munchos casos les violencies acompáñense d’agresiones verbales por acosu sexual, en referencia a los cuerpos de manera oxetivizante, y col usu d’espresiones como “perra, zorra, voi violate, voi llambete, pa detrás de maruxu contestatariu”.[41]
Una parte de la violencia escontra les muyeres y les neñes nun ye visible por asoceder nel entornu familiar.
Hai un aumentu de los casos d’embaranzos de madres menores de 14 años, asociáu a la marxinalidá y a la violencia basada en xéneru.
Pal 2022 la Oficina del ACNXDH informó de 115 casos de neños/es y adolescentes allistaos por grupos armaos non estatales (74 neños, 37 neñes y 4 ensin información sobre sexu). D’estos, 20 tendríenlos asesinao (11 neñes y 9 neños) y 12 neñes tendríen sufrío violencia sexual.[42]
“Amnistía Internacional tamién recibió información referente a la falta de respuesta o la respuesta deficiente del sistema de xusticia énte les denuncies presentaes por persones sobrevivientes de violencia basada en xéneru, especialmente por parte de la Fiscalía Xeneral de la Nación. Esto inclúi caracterizaciones xurídiques inadecuaes y presiones pa retirar denuncies presentaes. Tamién documentó’l mieu y la falta de confianza de diverses persones sobrevivientes, que decidieron nun acudir a la Fiscalía Xeneral de la Nación. Estos afayos son preocupantes, dau’l papel esencial que xuega la llucha escontra la impunidá pa garantizar el drechu que tienen les muyeres y les persones LGBTI a vivir una vida llibre de violencia y discriminación”.[43]
Les organizaciones de les víctimes del conflictu siguen denunciando l’abandonu del Estáu. Según el presidente Gustavo Petro: «La Unidá Víctimes convirtióse, como la SAE [Sociedá d’Activos Especiales], nun amagüestu de corrupción, construyeron mafies lligaes al paramilitarismu pa recuperar lo que perdieron. Espero qu’esti fiscal sía quien a investigala».[44]
6-. Impunidá
Siguieron les denuncies de les organizaciones de drechos humanos escontra’l Fiscal Xeneral FRANCISCO BARBOSA, por graves casos de corrupción dientro de la fiscalía y por protexer per aciu de falcatrúes xurídiques al ex-presidente ÁLVARO URIBE VÉLEZ y a persones allegaes, acusaes de fechos de corrupción y d’ataques graves a los drechos humanos.
Una fonte d’asimetríes xurídiques y d’impunidá ye la financiación de les empreses petroleres y mineres a la fiscalía y al Exércitu Nacional.
La fuercia pública al serviciu de les multinacionales, a traviés del Batallón Especial Enerxéticu y Vial, y una fiscalía ensin independencia son una fonte d’ataques graves ya impunes a los drechos humanos y de montaxes xudiciales escontra los opositores al estractivismu.
La delegación asturiana recibió denuncies escontra la Fiscalía de Casanare porque-y ta ñegando l’accesu a la xusticia a munches muyeres que viven nos asentamientos humanos de Nunchía y de la ciudá d’El Yopal, que denuncien amenaces de muerte, intimidaciones graves y fechos de violencia basada en xéneru.
Recibimos denuncies de persones de la dirixencia social de Casanare que contrasten la dexadez de la fiscalía coles denuncies de les muyeres y l’esmeru qu’esi organismu pon pa persiguir xudicialmente a persones de la dirixencia social que temen la continuidad de los montaxes y falsos positivos xudiciales como parte de la estratexa de criminalización de la protesta social.
La competencia de la xusticia penal militar pa xulgar ataques graves a los drechos humanos cometíos por integrantes de la fuercia pública ye una fonte d’impunidá estructural.
“L’ACNXDH saluda la decisión de la Corte Constitucional d’asignar a la xusticia ordinaria la xurisdicción sobre la masacre d’El Tandil (Tumaco), que tendríenla cometío integrantes de la fuercia pública nel 2017. Esto representa un avance na aplicación d’estándares internacionales rellacionaos cola xurisdicción competente pa conocer presuntos ataques a los drechos humanos por parte de componentes de la fuercia pública. Sicasí, obsérvase qu’estos estándares internacionales nun s’apliquen de manera consistente por tolos entes de xusticia, lo qu’aumentaría los niveles d’impunidá y compromete l’aplicación d’una xusticia independiente”.[45]
7-. Puelos indíxenes
Los puelos indíxenes siguen al borde del desañiciu físicu y cultural, polos ataques impunes escontra los comuneros y autoridaes tradicionales, y pola estrocena de los territorios ancestrales.
L’añu 2022 foi’l más violentu pa los puelos indíxenes dende la firma del alcuerdu de paz hai seis años.
La ONIC denunció qu’a lo llargo l’añu 2022 confinaron a 433.580 indíxenes de los puelos embera, zenú y awá, en territorios de los departamentos d’Antioquia, Chocó, Córdoba, Sucre y Nariño, y echaron pola violencia a 8.183 indíxenes de rexones de Córdoba, Nariño y Vichada.[46]
La Organización Nacional Indíxena informó que nel añu 2022 sufrieron los siguientes padecimientos: “1. Vulneración a l’autonomía y soberanía sobre los sos territorios ancestrales. 2. Falta de soberanía alimentaria. 3. Falta d’apoyos pa economíes propies. 4. Negativa al desarrollu de la plurinacionalidá. 5. Ruptura del texíu cultural y enzancu a les práctiques espirituales. 6. Incumplimientu del autodetermín y de l’autonomía. 7. Desnutrición estrema de neños, neñes y adolescentes. 8. Ataque a los drechos con enfoque de muyer, familia y xeneraciones. 9. Vulneración del drechu a la vida. 10. Delitos escontra la llibertá, la integridá y la formación sexual. 11. Trata de persones. 12. Captación de les economíes illegales / contrabandu. 13. Non afiliación al Sistema de Seguridá Social en Salú. 14. Falta de vivienda digna. 15. Falta de garantíes pal exerciciu de la etnoeducación. 16. Torga pal accesu a la educación intercultural certificada. 17. Discriminación y racismu. 18. Deportaciones o espulsiones illegales. 19. Pauperización y miseria. 20. Restricción a la movilidá na zona de frontera. 21. Esllarigamientu masivu forciáu. 22. Atentaos. 23. Allistamientu forciáu. 24. Amenaces. 25. Vulneración del drechu / principiu de participación y concertación. 26. Incumplimientu del drechu a la nacionalidá”.[47]
La ONIC espresa preocupación poles llaceries que xenera la condición apátrida na población indíxena d’árees de frontera, que nun foi reconocío como población binacional, con tola esclusión que xenera pa puelos como: “wayuu, awá, sikuani, cubeo, piapoco, curripaco, bari, inga, kichwa, yagua, tikuna, cocama, tule, yukpa, jivi, amorúa, u’wa, e’ñepa, makaguan, y otros, que comparten los elementos necesarios pa ser una nación: identidá cultural, territoriu, llingua, sistema de gobiernu, alministración de xusticia y el reconocimientu de la soberanía organizativa según los trataos de Drechos Humanos a los que s’obligó Colombia énte la comunidá internacional”.[48]
Conclusiones
1-. Valoramos la voluntá espresa del gobiernu de GUSTAVO PETRO y FRANCIA MÁRQUEZ de respetar los drechos humanos y construyir la paz, propósitos que xeneren esperances en Colombia y simpatíes n’Europa y de manera especial n’Asturies.
2-. Constatamos la espansión y la degradación creciente del conflictu armáu internu, con consecuencies graves pa la población civil, marcáu pol narcotráficu, la minería y los agronegocios.
3-. Nun hai garantíes. Siguen los ataques escontra la dirixencia social, los firmantes de la paz y les muyeres cabeces de casa nos asentamientos humanos de Yopal y Nunchía, la persecución escontra la dirixencia llabriego, los puelos indíxenes y les comunidaes negres con procesu previu de calumnies, y también la falta d’efectividá del sistema de protección y de garantíes.
4-. A la impunidá estructural súmase l’asimetría xurídica que xenera’l desdexamientu de la fiscalía pa xudicializar a quien agrede a la dirixencia social y a quien financia los ataques.
5-. La fiscalía ta ñegando l’accesu a la xusticia a muyeres que denuncien señalamientos y violencia basada en xéneru.
6-. les informaciones recibíes dan cuenta de la re-paramilitarización del Casanare y d’otres rexones del país nes qu’estos grupos son un para-Estáu.
7-. Siguen los ataques escontra puelos indíxenes en tol país. Los pueblos awá y los eperara-siapidara tán sometíos al allistamientu de menores y al confinamientu.
8-. Siguen ensin desminase los territorios de puelos indíxenes como los awá y los embera del Chocó.
9-. Persiste l’esllarigamientu forciáu de les comunidaes de Tumaco, Alto Mira y Frontera.
10-. Agraváronse los ataques econtra maestros/es rurales dexando miles de neños/es ensin accesu a la educación en zones del Cauca, Nariño, Putumayo, Arauca y otres rexones.
11-. Persisten les denuncias escontra empreses multinacionales como la minera canadiense Libero Cobre, que nel Altu Mocoa tien el refugu de les comunidaes, que custionen los sos métodos y l’impautu de la so actividá.
12-. Sigue l’allistamientu de menores y los actos de “llimpieza social” qu’afecten al colectivu LGTBI+, y tamién la esplotación sexual y la violencia escontra les muyeres nes zones petroleres y cocaleres de rexones como’l Putumayo.
13-. Siguen atacándose los drechos humanos de la población privao de la llibertá.
14-. Constatamos l’abandonu del Estáu a les víctimes de la guerra y la falta de voluntá de dalgunos funcionarios p’atendeles y facilita-yos reparación.
15-. Destacamos el trabayu que ta realizando l’Axencia de Restitución de Tierres, qu’avanza na eliminación de torgues p’axilizar na xera de devolver a les víctimes les tierres que-yos quitaron.
Recomendaciones al gobiernu de Colombia:
Concertar coles comunidaes les prioridaes d’inversión social del Estáu nos territorios y la presencia de la fuercia pública.
Priorizar midíes que lleven a un descensu humanitariu del nivel del conflictu armáu. Cese indefiníu del fueu y de los enfrentamientos col ELN.
Acelerar el cumplimientu del alcuerdu de paz soscritu coles FARC destinando recursos abondos nel Plan de Desarrollu cuatrienal.
Difundir les conclusiones de la Comisión de la Verdá y siguir les sos recomendaciones pa evitar la impunidá y la repetición.
Garantizar el drechu a la vida y les llibertaes fundamentales de la población.
Garantizar la realización de la consulta previa, llibre ya informada a los puelos indíxenes y a les comunidaes afro sobre los planes d’inversión qu’afecten a los territorios y a los puelos.
Garantizar l’accesu a la xusticia a les muyeres y a otros sectores sociales vulnerables, y tomar midíes pa evitar l’allistamientu de menores con fines béliques o d’esplotación sexual o llaboral.
La fiscalía tien d’asumir la responsabilidá d’investigar con procuru los actos de corrupción y los ataques a los drechos humanos cometíos por axentes del Estáu, y dexar d’usar la xusticia pa persiguir opositores sociales y políticos.
Recomendaciones a los gobiernos asturianu, español y européu:
Cumplimentar les resoluciones de los parllamentos respectivos, al respeutive del apoyu a la paz y a los drechos humanos en Colombia.
Acompañar con midíes concretes les formulaciones en cursu pa la paz total y pol respetu a los drechos humanos.
Promover y fortalecer los programes de protección pa persones defensores de los drechos humanos.
Instituciones entrevistaes
Alcalde de Puerto Guzmán, Putumayo
Alcaldía del Conceyu de Saravena, Arauca
Complexu Carcelariu y Penitenciariu Metropolitanu de Bogotá ‘La Picota’
Comandu del Departamentu de Policía del Casanare
Conseyu Departamental de Paz d’Arauca
Exércitu Nacional nel Putumayo
Embaxada d’España
Gobernador (e) d’Arauca, Wilinton Rodríguez Benavidez
Grupu de Caballería Mecanizada Nu 18 Xeneral Revéis Pizarro del Exércitu Nacional
MAP – OEA, Misión d’Apoyu a la Paz, Organización d’Estaos Americanos
Ministeriu d’Asuntos Esteriores de Colombia
Misión de Verificación de la ONX en Colombia
Oficina de Drechos Humanos del Ministeriu del Interior
Oficina de la ONX pa los Drechos Humanos
Representante del Conceyu de Pitalito (Huila)
Policía Nacional Departamentu del Putumayo
Procuraduría Rexonal del Putumayo
Responsable de Drechos Humanos na Gobernación del Putumayo
Secretariu de Gobiernu del Putumayo
URT, Unidá Alministrativa Especial de Xestión de Restitución de Tierres Desaposiaes
Unidá de Víctimes, Putumayo
UNP, Unidá Nacional de Protección, Putumayo
Unidá pa l’Atención y Reparación Integral a les Víctimes, enllaz en Puerto Leguízamo
Organizaciones entrevistaes
ACEU, Asociación Colombiana d’Estudiantes Universitarios
ACIESNA, Asociación de Cabildros Indíxenes Eperara Siapidara de Nariño
ACNXR, Axencia de la ONX pa los refuxaos
ACVC, Asociación Llabriega del Valle del Ríu Cimitarra
AJAA, Asociación de Mocedá y Amigos d’Aguazul
AMAR, Asociación Amanecer de Muyeres por Arauca
AMTA, Asociación de Muyeres Trabayadores Agropecuaries d’Arauquita
ANDAS, Asociación Nacional d’Ayuda Solidaria
ANJECO, Asociación Nacional de Mocedá y Estudiantes de Colombia
ARN, Axencia pa la Reincorporación y la Normalización, Putumayo
ASEDAR, Asociación d’Educadores d’Arauca
Asentamientos Humanos de Nunchía y Yopal (Casanare)
ASEP, Asociación d’Educadores del Putumayo.
ASMUC, Asociación de Muyeres Auníes por Casanare
Asociación llabriega Puerto Guzmán
Asociación Comunitaria Agroalimentaria del Piedemonte
Asociación de Collaciones del Cunamá (Aguazul)
Asociación Productores y Comercializadores de Yuca
Asociación de Carretilleros de Puerto Guzmán
ASOCOETNAR, Asociación de Conseyos Comunitarios y Organizaciones Étnico-territoriales de Nariño
ASOJER, Asociación Moza y Estudiantil Rexonal
ASOJUNTAS, Asociación de Xuntes d’Aición Comunal del Conceyu de Saravena
ASOMAGÜI, Asociación de Conseyos Comunitarios de Magüi
ASONALCA, Asociación Nacional Llabriega José Antonio Galán Zorro
ASOVEC, Asociación de Collaciones de Cunamá
AVISPAD Asociación de Víctimes del Esllarigamientu
Cabildru nasa de Puerto Asís
Cabildru nasa Guaduales
CAMAWARI, Asociación d’Autoridaes Tradicionales del Puelu Awá
Campaña Escontra la Brutalidá Policial
Cantores – Voces del Pacíficu
COAGROSARARE, Cooperativa Agropecuaria del Sarare
Colectivu xuvenil RAÍCES Guzmanenses
COMUCCOM, Cooperativa Multiactiva Comunitaria del Común
Conseyeres/os Mayores de la ONIC
Conseyería de los Cabildros del Puelu nasa del Putumayo
Conseyu Comunitariu La Voz de los Negros
Conseyu de Paz d’Arauca
Conseyu Mocedá de Pitalito
Coordinador nasa Baxu Putumayo
COOTRANAR, Cooperativa de Tresportadores d’Arauquita
CORDECAMPO, Corporación pal Desarrollu y Defensa del Campu
COSPACC, Corporación Social pa l’Asesoría y Capacitación Comunitaria
CPDH, Comité Permanente pola Defensa de los Drechos Humanos, Nariño (Arauca)
CRIC, Conseyu Rexonal Indíxena del Cauca
CSPP, Comité de Solidaridá colos Presos Políticos
CUT, Central Unitaria de Trabayadores
Delegación del CRIC n’Aguaditas
ECAAAS, Empresa Comunitaria d’Acueductu, Cantarelláu y Aséu de Saravena
Ex-alcalde de Timaná (Huila)
FECODE, Federación Colombiana d’Educadores
Federación de Xuntes d’Aición Comunal
FENSUAGRO, Federación Nacional Sindical Unitaria Agropecuaria
Firmantes del Alcuerdu de Paz
Fundación de Drechos Humanos Joel Sierra
Fundación defensa DDHH, Pitalito
GAMBICA, Asociación de Muyeres
Gobernador nasa resguardu Cerro Guadua
Gobernador nasa resguardu El Descanso
Gobernador resguardu Aguaditas
Guardia Amazonía
Guardia Llabriega del Putumayo
Guardia Indíxena Awá
Guardia Indíxena Nasa (Putumayo)
Guardia Interétnica, Llabriega y Popular del Centro-oriente
JAC Medio Afán
JAC collación La Morelia
JAC collación La Patria
JAC, Xunta d’Aición Comunal del Altu Mira y Frontera
JAC, Xunta d’Aición Comunal El Cedro, collación Calenturas
JUCO, Mocedá Comunista Colombiana
Xusticia y Paz, Putumayo.
Marcha Patriótica
Mesa d’Organizaciones Cívico-populares d’Arauca
Mesa de Víctimes de Puerto Guzmán
Mesa de Víctimes de Tumaco
Mesa de Víctimes Pitalito
Mesa de Víctimes Adulto Mayor, Putumayo
MOVICE, Movimientu de Víctimes de Crímenes d’Estáu
Movimientu Social y Políticu de Mases del Nororiente
Movimientu Vía Llabriega en Colombia
OFB, Colectivu Socioxurídicu Orlando Fals Borda
OIC, Organización Indíxena del Casanare
ONIC, Organización Nacional Indíxena de Colombia
ORIPAP, Organización de Resguardos Indíxenes del Puelu Awá del Pacíficu
Padre Luis Albeiro Camacho, diócesis de Yopal
Partíu Comunes
PCC, Partíu Comunista de Colombia
Presos políticos del ELN en La Picota
Puelu indíxena U´wa, resguardu Chaparral (Barronegro)
RECOMPAS, Rede de Drechos Humanos del Pacíficu Sur
Rede de Drechos Humanos del Putumayo, Piamonte y Sucumbíos (Ipiales, Nariño)
ReDHPana, Rede de Drechos Humanos del Pacíficu Nariñense
SINDEAGRO, Sindicatu de Pequeños y Medianos Productores Agropecuarios del Departamentu d’Arauca
SINDEAGRO, Sindicatu de Pequeños y Medianos Productores del Agro
SINTRAPAZ, Sindicatu de Trabayadores Agrícoles del Sumapaz
SINTRAPUTUMAYO, Sindicatu de Trabayadores del Petroleu del Putumayo
UNIPA, Unidá Indíxena del Puelu Awá
USO, Unión Sindical Obrera de la Industria del Petroleu
UTRAHUILCA, Cooperativa Llatinoamericana d’Aforru y Creitu
Vía Llabriega Colombia
MEDIOS DE COMUNICACIÓN
Canal Via3tv
Casanare Online
Emisora Armonía
La Red, Informativos del Casanare
La Voz de Yopal
Manantial Noticias
Noticias de Saravena
Noticias del Piedemonte
Prensa Libre
Radar Noticias de Saravena
Radio Noticia del Casanare
RCN
Semanario VOZ
Trochando Sin Fronteras
[1]https://colombia.unmissions.org/%E2%80%9Cen-un-mundo-de-divisiones-geopol%C3%ADticas-guerras-interminables-y-multiplicaci%C3%B3n-de-conflictos
[2] Comunicáu “En Colombia retoña la Paz”. Soldepaz Pachakuti, Colectivu de Colombianos Refuxaos n’Asturies. Xixón, setiembre/22.
[3] Entrevista col partíu Comunes. Bogotá, 21 de febreru del 2023.
[4]https://www.jep.gov.co/macrocasos/caso03.html#container
[5]https://comisiondelaverdad.co/
[6]Entrevista cola URT. Bogotá, 21 de febreru del 2023.
[7]https://curate.nd.edu/show/z029p270x6d
[8]https://elpais.com/america-colombia/2023-03-29/un-ataque-con-explosivos-a-una-base-del-ejercito-en-el-catatumbo-deja-al-menos-nueve-militares-muertos-y-ocho-heridos.html
[9]https://www.frontlinedefenders.org/sites/default/files/1535_fld_ga23_web.pdf
[10]https://rutasdelconflicto.com/notas/2022-cuatro-paises-latinoamerica-concentraron-el-mayor-numero-ataques-defensores-informe
[11]Reunión cola Oficina de Drechos Humanos del Ministeriu del Interior.
[12]https://elpais.com/america-colombia/2023-01-04/el-gobierno-de-colombia-suspende-el-decreto-del-cese-al-fuego-con-el-eln-pero-insiste-en-acordar-una-tregua.html
[13]https://efe.com/mundo/2023-03-20/petro-suspende-el-cese-bilateral-con-el-clan-del-golfo-tras-el-paro-minero/
[14]https://www.ohchr.org/es/press-releases/2023/03/colombia-misuse-counter-terrorism-measures-prosecute-protesters-threatens
[15]https://www.amnesty.org/es/documents/amr23/6234/2022/es/
[16]Entrevista con autoridaes del puelu awá. Tumaco, 13 de febreru del 2023.
[17]https://www.servindi.org/actualidad-noticias/04/07/2022/asesinan-gobernador-y-dos-guardias-indigenas-del-pueblo-awa
[18]https://www.arcoiris.com.co/wp-content/uploads/2023/02/DENUNCIA-PUBLICA-16-02-2023-William-Castro.pdf
[19]https://www.facebook.com/Rede DD. HH. Putumayo/
[20]https://www.facebook.com/photo?fbid=235032875570256&set=pcb.235032918903585
[21]https://www.biodiversidadla.org/Noticias/Colombia_paramilitarismo_y_empresas_petroleras_en_el_Casanare
[22]Reunión col departamentu de Policía del Casanare. Yopal, 15 de febreru del 2023.
[23]Audiencia en Nunchía. 13 de febreru del 2023.
[24]Audiencia n’Arauca. 16 de febreru del 2023.
[25]Entrevista cola alcaldesa encargada de Saravena. 18 de febreru del 2023.
[26]Reunión col Grupu de Caballería Mecanizáu Revéis Pizarro, Saravena. 18 de febreru del 2023.
[27]Entrevista con CARLOS DE LA TORRE. Oficina de la ONX en Colombia.
[28]https://indepaz.org.co/lideres-sociales-defensores-de-dd-hh-y-firmantes-de-acuerdo-asesinados-en-2022/
[29]Audiencia en ciudá d’Arauca. 16 de febreru del 2023.
[30]https://www.amnesty.org/es/documents/amr23/6234/2022/es/
[31]https://prensalibrecasanare.com/industriapetrolera/38383-libres-2-lnderes-sociales-del-bloque-cubiro-20-meses-estuvieron-privados-de-la-llibertá-por-denuncia-de-frontera-energy.html
[32]https://casanarehoy.com.co/site/actualidad/alias-john-calzones-ahora-amenaza-hasta-los-sacerdotes-para-robar-terrenos/
[33]Audiencia n’Arauca. 16 de febreru del 2023.
[34]https://elpais.com/america-colombia/2022-10-21/la-jep-propone-sancionar-a-responsables-de-falsos-positivos-con-proyectos-de-reparacion.html
[35]https://www.hchr.org.co/wp/wp-content/uploads/2023/03/Informe-Anual-2022-en-castellano.pdf
[36]https://razonpublica.com/la-masacre-alto-remanso-terror-estrategia-militar/
[37]https://ddhhcolombia.org.co/2023/03/03/informe-onu-ddhh-2023/
[38]https://www.hchr.org.co/wp/wp-content/uploads/2023/03/Informe-Anual-2022-en-castellano.pdf
[39]https://www.defensoria.gov.co/-/cauca-choc%C3%B3-nari%C3%B1o-y-arauca-los-m%C3%A1s-afectados-desplazamiento-forzado-y-confinamiento-en-julio
[40]https://www.onic.org.co/images/CO-INFO-20230102-informe_final_afectaciones_DDHH_pueblos_indigenas_ONIC.pdf
[41] Defensoría del Puelu de Colombia, Boletín #3 violencies basaes en xéneru nel marcu de la protesta social, Delegada pa los Drechos de les Muyeres y Asuntos de Xéneru, 4 de xunu del 2021.
[42]https://www.hchr.org.co/wp/wp-content/uploads/2023/03/Informe-Anual-2022-en-castellano.pdf
[43]https://www.amnesty.org/es/documents/amr23/6234/2022/es/
[44]Hollman Morris – La Unidad Víctimes se convirtió como la SAE, un festín de corrupción» | Facebook | By Hollman Morris | «La Unidad Víctimes se convirtió como la SAE, un festín de corrupción, construyeron mafias ligadas al paramilitarismu pa recuperar lo que perdieron….
[45]https://www.hchr.org.co/wp/wp-content/uploads/2023/03/Informe-Anual-2022-en-castellano.pdf
[46]https://www.onic.org.co/images/CO-INFO-20230102-informe_final_afectaciones_DDHH_pueblos_indigenas_ONIC.pdf
[47]https://www.onic.org.co/images/CO-INFO-20230102-informe_final_afectaciones_DDHH_pueblos_indigenas_ONIC.pdf
[48]https://www.onic.org.co/images/CO-INFO-20230102-informe_final_afectaciones_DDHH_pueblos_indigenas_ONIC.pdf
Deja una respuesta