Informe Colombia (n’asturianu)

INFORME DE LA QUINTA VISITA ASTURIANA PA PESCUDAR LA SITUACIÓN DE LOS DRECHOS HUMANOS EN COLOMBIA 2009

https://issuu.com/soldepaz-pachakuti/docs/v-informe-colombia-ast

1-. Presentación

“Les comunidaes de paz del baxu Ariari y la guardia indíxena del Cauca garraron los drechos humanos nes propies manes a pesar de la represión. Son esperiencies valioses de resistencia pacífica a la violencia, pa les que ye mui importante la solidaridá del Principáu d’Asturies, que recibe y protexe a persones persiguíes que d’otra manera igual nun taríen cuntando la so hestoria. El trabayu de la comisión asturiana ayuda a protexernos de l’arbitrariedá del exércitu y de los paramilitares, que saben que nun va haber silenciu pa los sos crímenes”
S.J. Javier Giraldo. CINEP. La Macarena, 21 d’abril del 2009

El gobiernu de Colombia reconoz la permanencia d’atentaos graves a los drechos humanos, proclama tener algamao avances y declárase abiertu a la revisión internacional nesta materia, polo que garró la iniciativa de presentase al Esame Periódicu Universal de drechos humanos n’avientu del 2008.

Esta disponibilidá pa falar de los drechos humanos comprobóse nes entrevistes institucionales de la comisión asturiana y nos informes de la oficina de l’Alta Comisionada de Naciones Xuníes pa los drechos humanos, que va tar nel país hasta’l 30 d’ochobre del 2010.

El gobiernu colombianu presenta los ataques a los drechos humanos como series de cifres que sumen fechos aisllaos, como si fueren desgracies fortuites que nun tán lligaes al conflictu social y militar, orixináu en desigualdaes y desequilibrios estructurales hestóricos.

Ello ye que mientres se ñega la esistencia del conflictu militar [1] -al que se destina gran parte de los recursos públicos- descuídense les obligaciones sociales del Estáu y atribúyense les execuciones estraxudiciales a conductes esmaniaes d’individuos aisllaos dientro la fuercia pública.

Evítase la responsabilidá política ya inténtase llimpiar la imaxe d’instituciones que, como l’exércitu nacional o’l DAS, tán inmersos n’ataques sistemáticos a los drechos humanos, como pudimos constatar a lo llargo de cinco visites realizaes a Colombia, y como lo constató la Corte y la Comisión Interamericana de Drechos Humanos.

Anque en Colombia nos ataques a drechos humanos tienen responsabilidá tolos actores armaos, llegales o non, ye’l gobiernu’l que tien la responsabilidá constitucional de velar pol respetu del drechu a la vida, la integridá física y les llibertaes básiques de la población.

Nel contestu de conflictu colombianu les cifres d’ataques a los drechos humanos siguen siendo mui altes, tanto como los índices de concentración de la renta, l’ingresu, la riqueza y la propiedá de les tierres que lleven apareyaos.

Siguieron los ataques escontra los grupos especialmente fráxiles, como los sindicalistes, defensores de los drechos humanos y grupos étnicos, en munchos casos con responsabilidá de los empresarios y de les fuercies de seguridá del Estáu.

Grave sobre manera ye la constatación de que sectores amplios de los poderes públicos acutáronlos axentes de los grupos narcoparamilitares que pertenecen a sectores políticos afines al gobiernu. Hai una cifra alta de senadores y representantes de la Cámara presos y otru grupu importante llamáu a xuiciu polo que se llama “la parapolítica”.

L’Axencia Asturiana de Cooperación al Desarrollu, atendiendo al deber éticu y al llamáu de les organizaciones colombianes que defenden los drechos humanos, decidió fortalecer nel 2009 el Programa Asturianu de Drechos Humanos qu’acueye a sindicalistes y defensores cola vida amenazada y realizar la V Visita pa pescudar los drechos humanos en cinco rexones del país, onde hai operaciones militares en cursu y onde permanecen los ataques a los drechos humanos.

Esti ye’l quintu informe d’una realidá que sigue esmoleciendo al gobiernu asturianu. Presentámoslu como una aportación solidaria escontra la impunidá, cola almiración de l’Axencia Asturiana de Cooperación al Desarrollu pol valor de les persones que se xueguen la vida en Colombia pol respetu de los drechos humanos y pola paz con xusticia social.

El V informe entrégase a la opinión pública, a les estructures de drechos humanos de la ONX, OEA, Xunión Europea, OIT, parllamentos y gobiernos de Colombia, Europa, España, Asturies, organizaciones sociales y medios de comunicación.


[1Les autoridaes colombianes caltienen una postura de ñegación absoluta; incluso ñéguense a reconocer qu’hai un conflictu armáu nel país. Sicasí, la xente cúntamos una versión mui diferente… Ye imposible resolver un problema ensin almitir que lu hai. Ñegando la situación nun se consigue más que condergar a más persones a sufrir abusos o a morrer.” Marcelo Pollack, investigador sobre Colombia d’Amnistía Internacional. Madrid, 28 d’ochobre del 2008.