Presentación: Les Semientes, patrimoniu de la Humanidá

ALCUENTRU de SENSIBILIZACIÓN Sur-Norte

Les Semientes, patrimoniu de la Humanidá.

(POLA REFORMA AGRARIA, L’ALIMENTACIÓN, LA BIODIVERSIDÁ, LA ECONOMIA CAMPESINA Y LA PAZ.)

Siero, Asturies: 23 y 24 d’abril 2004.

 1-. Presentación.

Galmia pel mundiu la reivindicación del drechu a l’alimentación y a un mediu ambiente sanu como asuntos del mayor interés pa les persones y los pueblos, alredor de los que s’entamen descomanaes lluches sociales y polítiques.

Crez la sensibilidá énte temes como la fame que gólpia a centenes de millones de persones, sobre manera n’África, Asia y América Llatina; el grave estrozu del mediu y los ecosistemes, la perda de biodiversidá y la conderga al desaniciu como pueblos sobrantes pa los/es campesinos/es de tol mundiu.

Son problemes pergrandes qu’afeuten a muncha xente y que ponen en peligru la Vida mesma enriba’l Planeta.

L’agricultura en manes de la Organización Mundial del Comerciu ta globalizando la fame y la miseria. Según el movimientu mundial Vía Campesina "pal pequeñu agricultor el gran mercáu global nun esiste nin interesa" y lo importante ye "la llucha pola tierra, la soberanía alimentaria, l’agua, les semientes y un comerciu xustu" en tolos ámbitos.

Nun ye abondo con desaniciar los subsidios nos países ricos, dixeren los campesinos nel Foru Social Mundial de Mumbay-India. Al pequeñu y medianu agricultor nun-y val que-yos digan que van poder esportar a Estaos Xuníos o a Europa porque, cenciellamente, millones d’ellos nun tienen tierra au acollechar nin condiciones pa esportar a nenyuri, nin manera d’entrar nel negociu nel nivel llocal.

Poro, persones de pueblos y ciudaes de tol mundiu coincidimos en que ye menester lliberar la tierra del control de les tresnacionales, llatifundistes y especuladores que constitúin monopolios sobre la propiedá y sobre los alimentos, qu’amenacen con monopolizar tamién l’agua y aguiyen investigaciones pa remanar y patentar la vida camudando xenéticamente especies y semientes pol so petite porgoyosu d’apropiase de la vida.

Y nun ye un problema namás n’América o n’África y Asia. Vía Campesina denuncia cómo 200.000 pequeños campesinos son emburriaos a la probitú urbana añalmente n’Europa.

Va faciéndose cada vegada más clara la urxencia d’algamar lluches populares en tol mundiu por reivindicaciones comunes a los/es campesinos/es y los/es pobladores urbanos/es como son los drechos a la tierra, l’agua y a la soberanía alimentaria. Como la distribución de tierres, a cencielles, nun ye abondo pa garantizar una meyor calidá de vida pa los/es campesinos/es y pobladores urbanos/es, fai falta construyir un nuevu modelu de producción agricola y una nueva forma d’organización social de la población que vive en mediu rural.

La defensa de la soberanía alimentaria, esto ye: el principiu de que cada pueblu, nel so espaciu específicu, seya quien a producir los alimentos que consume, trai arreyao tamién la defensa del drechu a l’alimentación sana y, pel so llau, los drechos d’accesu a la tierra y al agua, la defensa de les semientes como patrimoniu común de la humanidá, l’equilibriu territorial y la proteición del mediu ambiente pa toos/es.

 2-. OXETIVOS.

1.. Esparder per Asturies la problemática arreyada a l’alimentación y el mediu: tierra, agua, semientes, comerciu d’alimentos.

2.. Posibilitar l’intercambiu y la reflexón alredor de les esperiencies personales y organizatives de pueblos d’América Llatina en rellación cola llucha pola reforma agraria y la soberanía alimentaria.

3.. Divulgar les propuestes y formulaciones qu’empobinen hacia la defensa de la economía campesina y el drechu a l’alimentación y al mediu ambiente sanos.

4.. Afitar mecanismos de comunicación ya intercambiu que favorezan la implicación de la Cooperación Asturiana colos procesos diversos de defensa de la tierra.

 3-. CONTENÍOS

Exes y formulaciones básiques:

La reforma agraria: estratexa global pal desendolcu social y la paz

Les semientes: patrimoniu común de la humanidá, base de la biodiversidá y de la seguranza alimentaria

L’agua: nun ye mercancía sinón bien públicu y drechu humanu inalienable, propiedá del planeta y de toles especies pa siempre.

L’alimentación y el comerciu: llucha ente l’interés xeneral y los monopolios.

La economía campesina: esiste, produz, resiste organizada.

 invitaciones/ponentes:

MST Brasil.

Mandato Campesino de Colombia

Anamuri de Chile.

Sindicato Labrego Galego.

COAG.

PLataforma Rural.

CUTCB de Bolivia.

Vía Campesina.

Universidá d’Uviéu.

Collaboraciones:

Escuela Universitaria de Trabayu Social XIXÓN.

Plataforma Rural Asturies.

Facultá de Pedagoxía.

Cambalache.

Conceyu Siero

Albergue Conceyeru La Carrera.

Axencia Asturiana de Cooperación.